Opa Ferrol ou como o PPdeG "recuperará o tempo perdido" na cidade departamental

O presidente do PPdeG, Alfonso Rueda, asegurou que o candidato da súa formación á Alcaldía de Ferrol, José Manuel Rey Varela, ten que ser o rexedor desta cidade para desta maneira "recuperar o tempo perdido" e a urbe "esperte".

Rueda pronunciouse deste xeito tras manter unha comida nun hotel da cidade departamental, no que se reuniu cos integrantes da candidatura do PP e do comité local. "El coñece a cidade", destacou Rueda sobre o candidato popular e antes de lembrar algunhas das actuacións que leva a cabo o seu Goberno na cidade e comarca.

Así, citou "os 27 millóns para reformar e ampliar o hospital Arquitecto Marcide", os "8 millóns para a vía de alta capacidade da Costa Norte ou os 3 millóns para a Residencia de maiores de Caranza". Ademais, referiuse ao Plan Ferrol, para asegurar que é un asunto no que a Xunta "está a cumprir" e que o Goberno central "decide ignorar".

"Eu quero asinar contigo o convenio para finalizar o hospital, que leva catro anos nun caixón do Concello", dixo dirixíndose a Rey Varela. O mesmo, dixo, co "convenio para o saneamento do rural" e para o "novo centro de saúde de San Xoan".

Pola súa banda, Rey Varela aproveitou este acto para asinar publicamente un documento que recolle o seu compromiso con cen medidas. "Queremos que Ferrol sexa un exemplo de xestión, queremos formar un goberno do que os ferroláns estean orgullosos, e por iso prometemos honrar ao pasado, mellorar o presente e cambiar o futuro", destacou.

Por último, o candidato do PP á Alcaldía de Ferrol detallou que "este contrato do cambio é a primeira pedra para iso". "É a columna vertebral dese movemento vertebrador que denominamos Opa Ferrol", en alusión ao que será a súa lema de campaña.