Pontón defende a cooperación transfronteiriza e a construción dunha "Galicia verde" desde os concellos
Pontón referiuse nun acto electoral en Tomiño á xestión conxunta do espazo natural do Miño
Por E.P. | VIGO | 22/05/2023 | Actualizada ás 18:30
A portavoz nacional do BNG, Ana Pontón, participou este luns nun acto electoral en Tomiño (Pontevedra), onde puxo en valor a cooperación transfronteiriza con Portugal desde os concellos gobernadas por esta forza nacionalista, "para suplir a inacción do Goberno central e da Xunta".
Así, Pontón referiuse á xestión conxunta do espazo natural do Miño e dirixiuse ás persoas "preocupadas pola preservación do medio ambiente e do territorio" para pedir a súa "mobilización" nas urnas, collendo a papeleta do BNG, "porque o papel desde o local é imprescindible na preservación do planeta".
Respecto diso, subliñou que "construír unha Galicia en verde é unha prioridade para o BNG", e así o demostra nos concellos nos que goberna, con políticas pioneiras na xestión de residuos, na protección da biodiversidade, na recuperación de espazos urbanos para a xente e na loita contra a emerxencia climática. Por iso, apelou ao voto da xente que aposta por unha Galicia sustentable, que loita "contra o espolio eólico", que protestan contra a contaminación das multinacionais mineiras, e que queren coidar os ríos.
Ana Pontón advertiu da importancia que ten actuar "desde o local, concello a concello, desde cada vila e cidade", e puxo en valor tamén a cooperación transfronteiriza. "Hoxe estamos aquí para lembrar a importancia estratéxica que ten para Galicia a relación con Portugal, en particular para todos os concellos que integran a eurorrexión, unha cuestión crave desde o punto de vista económico e social, pero que o Goberno central e da Xunta ignoran case por completo", apostilou.
Nese sentido, a líder do BNG lembrou que Galicia está unida a Portugal non só por vínculos históricos, senón tamén por cuestións como as infraestruturas, a economía ou a investigación. Por iso, apostou por facer do territorio transfronteirizo "un lugar de oportunidades e non de conflito", traballando na "cohesión territorial", na captación de fondos e na mellora da calidade de vida.
