Conde na súa despedida da Cámara: "a Galicia foille moi mal con Pedro Sánchez"
O PSdeG deséxalle un "digno labor de oposición" ao próximo Executivo, que augura que volverá presidir o líder do PSOE.
Por E.P. | SANTIAGO DE COMPOSTELA | 14/06/2023 | Actualizada ás 12:09
Unha pregunta sobre os compromisos da Xunta coas empresas interesadas nos fondos 'Next Generation' serviu ao ata agora vicepresidente primeiro, Francisco Conde, para despedirse do pleno do Parlamento galego, nunha intervención na que esperou que o resultado das eleccións do próximo 23 de xullo supoña un cambio de goberno, porque a Galicia, dixo, "foille moi mal con Pedro Sánchez".
Con anterioridade, a deputada socialista Begoña Rodríguez Rumbo deu o parabén a Conde con ironía, e desexoulle un futuro no que poida facer "digno labor de oposición" ao próximo executivo, que augurou que volverá liderar Sánchez. Deste xeito, aseguroulle que "terá ocasión de enfrontarse directamente" a el, en alusión ás críticas que con frecuencia fai o vicepresidente primeiro á xestión do Goberno central.
Sen ir máis lonxe, nesta pregunta no pleno, Conde reivindicou que "Galicia fixo os seus deberes" ao ter "unha carteira de proxectos que teñen o respaldo da Xunta". "Só temos unha traba para poder impulsalos: e é que o Goberno lles dea acceso aos fondos europeos dos que se reservou o 100% da súa execución", incidiu, en referencia a aqueles vinculados cos denominados 'Perte', para sectores industriais.
"FOI UN ORGULLO"
Conde comezou agradecendo "a oportunidade de intervir nesta Cámara por última vez como membro do Goberno", e destacou que foi "unha honra traballar por e para Galicia durante estes 14 anos". Así, deu as grazas pola confianza "ao presidente Feijóo, ao presidente Rueda, pero tamén a toda a cidadanía" e a "todos os deputados". "Foi un orgullo", remarcou.urou.
