Un accidente de tráfico en Coristanco deixa seis persoas feridas

Unha colisión entre dous turismos deixa seis persoas feridas en Coristanco (A Coruña). Nun dos vehículos viaxaban cinco ocupantes, entre eles un bebé. No outro, só o condutor. Todos requiriron asistencia sanitaria. Segundo informou o 112 Galicia, recibiu o aviso deste accidente a través da chamada dun particular, cinco minutos despois das 17 horas.

Na conversación, o alertador indicou que acababan de chocar dous vehículos no quilómetro 4 da DP-1912, en Silván (parroquia de Erbecedo). Ademais, apuntaba que había varias persoas feridas. Ata o lugar tiveron que desprazarse varias ambulancias, que atenderon e evacuaron aos feridos, mentres o GES de Ponteceso fíxose cargo da limpeza da vía. No operativo, ademais de Urxencias Sanitarias de Galicia-061, participaron tamén o GES de Ponteceso, a Garda Civil de Tráfico e os voluntarios de Protección Civil de Coristanco.

TRES FERIDOS TRAS CHOCAR CONTRA UN MURO NAS NEVES

Doutra banda, tres persoas resultaron feridas ao chocar co seu vehículo contra o muro dunha vivenda nas Neves. Este accidente ocorreu na PO-415, ao seu paso por Liñares. O copiloto do turismo tivo que ser trasladado nun helicóptero medicalizado. Pola súa banda, o condutor e a persoa que ocupaba un dos asentos traseiros foron evacuados en ambulancia ao centro hospitalario de referencia. O copiloto, cuxo estado revestía maior gravidade, perdía a consciencia cada pouco tempo.

Rapidamente, o 112 Galicia coordinou a acción dos servizos de emerxencias, informando a Urxencias Sanitarias de Galicia-061, que mobilizou o helicóptero medicalizado con base en Ourense, ao GES-SPEIS de Ponteareas, aos Bombeiros do Porriño, que non chegaron a acudir, e aos axentes da Garda Civil de Tráfico.

Axega informa da colisión de dous vehículos. 112 Galicia.. AXEGA 112 GALICIA