BNG e PSdeG acusan ao PP de usar "a porta de atrás" na aprobación da lei do litoral para "confrontar" co Goberno
O PP incorpora máis dunha trintena de emendas do BNG, entre elas a creación dun Foro do Litoral e aumento de multas, coa negativa do PSdeG a facer achegas
Por Europa Press / Redacción | SANTIAGO DE COMPOSTELA | 26/06/2023 | Actualizada ás 15:13
A Comisión de Ordenación Territorial deu luz verde ao ditame da lei de litoral --o texto articulado contou cos votos a favor do PP e a abstención da oposición--, unha norma que queda lista para a súa aprobación definitiva no pleno da semana que vén do Parlamento galego.
O PPdeG incorporou máis dunha trintena de emendas do BNG --entre as íntegras e transaccionadas-- das 85 presentadas ao texto, ao que o PSdeG non presentou ningunha incorporación. Durante o debate deste luns, a oposición denunciou que os populares optasen por unha tramitación "exprés" desta norma para aprobala "pola porta de atrás" co fin de buscar a "confrontación" co Goberno central.
Neste sentido, a deputada do Bloque Alexandra Fernández censura que "o que oculta esta manobra" do PP de aprobar con "présas" esta lei é a de "confrontar" co Goberno en plena campaña ás xerais. Por iso, reproba o "uso partidista" do Parlamento por parte do PPdeG e denuncia que a tramitación "coartou" a participación da sociedade civil. Alerta de que non se deu trámite de audiencia nin se requiriu "o perceptivo informe" ao Consello Económico e Social (CES), algo "moi grave" polo que o presidente do CES, Agustín Hernández, presentou "informe de queixa" á Xunta.
Nesta liña, Patricia Otero (PSdeG) xustificou o cambio de postura do PSdeG, que nun inicio mostrara o seu apoio á lei, por "as présas" do PP para sacar adiante o texto e "furtar o debate". Apunta que a Administración autonómica falaba de "seguridade xurídica" a través dun debate "sosegado", pero, "ao final, as intencións que escondía" era "acomodar os trámites parlamentarios desta lei aos intereses da Xunta", polo que non serán "cómplices nin colaboradores necesarios". "A única intención foi acurtar os tempos para adaptalos aos seus intereses electorais", agrega.
Respecto diso, o deputado popular Alberto Pazos Couñago recoñeceu que "é certo que o relatorio foi curta no tempo", pero asegura que tendeu a man á oposición "hai máis de dúas semanas antes de ser convocada". Así mesmo, negou que se acurtaron tempos de debate e defende que a lei foi "enriquecida" por expertos internacionais, universidades, xente do mar e a cadea mar-industria.
No debate final en comisión, Pazos Couñago destacou que os populares aceptaron o 38'8% das achegas do Bloque, á vez que afeou a postura do PSdeG de non realizar emendas, no que ve como un "ataque de cornos de última hora difícil de entender". Aquí lamenta o cambio de postura dos socialistas, que pasaron de apoiar a lei a través de Valentín González Formoso a unha "negativa radical" que achaca a José Ramón Gómez Besteiro. "Parece que Besteiro está en mellor forma", dixo sobre o "pulso interno" dos socialistas.
De feito, nunha rolda de prensa paralela a esta comisión, o portavoz parlamentario popular, Pedro Puy, reprochou que o PSdeG "se desatendese" do debate, pois "é o máis irresponsable que pode facer un grupo da oposición". "Decidiron non presentar ningunha emenda e asistir como convidados de pedra", apostilou.
