O PSOE critica que Quintana "tivo que fuxir" ante o conflicto da mexilla
Pola súa parte o novo conselleiro sostén que a solución foi "máis que óptima"
Por Europa Press / Redacción | SANTIAGO DE COMPOSTELA | 28/06/2023 | Actualizada ás 20:01
O conselleiro do Mar, Alfonso Villares, sostén que o conflito da mexilla "tivo unha solución máis que óptima" coas medidas implementadas pola Xunta na campaña de extracción que acaba de terminar para que os produtores puidesen cubrir as súas necesidades de cría de face a garantir a produción.
No pleno do Parlamento, o deputado socialista Julio Torrado criticou a xestión deste conflito por parte da conselleira saínte, Rosa Quintana, que "tivo que fuxir a unha provincia de interior", en alusión á súa marcha como candidata do PP ao Congreso por Ourense.
Na súa intervención, Torrado sinalou que 'bateeiros' e 'percebeiros' levaban 60 anos convivindo nas rocas "ata que entrou esta consellería como elefante nunha cacharrería", de forma que "non había ninguén contento excepto" Mar, un departamento ao que acusou de "tentar que se enfronten uns a outros".
En cambio, o titular de Mar subliñou que o seu departamento foi "flexible" nos últimos meses ata conseguir que a maioría das bateas conten co recurso necesario para a súa produción. Entre outras cuestións, subliñou a recente ampliación dunha semana na campaña extractiva en función da "demanda real" detectada.
Así mesmo, Villares apela ao diálogo para "convivir" entre ambos os sectores e aposta por unha ordenación da fazula a través dun plan de xestión co que adecuar a extracción ás necesidades. "O resultado mostra que non houbo tardanzas nin inmobilismos", afirma.
