Pacto de PP, BNG e PSdeG en Narón para subir o salario dos seus portavoces
Pactan dedicacións exclusivas para os seus portavoces e aumentar cantidades por outros conceptos. Un acordo ao que se opuxo o partido que goberna, Terra Galega.
Por Europa Press / Redacción | SANTIAGO DE COMPOSTELA | 30/06/2023 | Actualizada ás 13:57
Os tres grupos na oposición do Concello de Náron, PP, BNG e PSOE, que suman 11 edís dunha corporación composta por 21 concelleiros e onde goberna Terra Galega con dez representantes, pactaron crear tres dedicacións exclusivas para cada un dos portavoces destes grupos. Concretamente, acordaron unha retribución anual de 32.669 euros para Germán Castrillón (PP), Olaia Ledo (BNG) e Silvia María de Arriba (PSOE).
Pero esta proposta non saíu finalmente adiante o pasado mércores, 28 de xuño, durante a celebración do pleno de organización, ao absterse na votación as tres formacións, o que motiva que este asunto terá que ser levado de novo a pleno.
A proposta de Terra Galega pasaba por manter unha dedicación exclusiva para a alcaldesa, Marián Ferrerio, co mesmo soldo que o pasado mandato, de 57.599 euros brutos anuais, unha dedicación exclusiva para outro concelleiro e tres parciais para os outro tres edís do goberno.
Na que expuxo a oposición, onde o PP ten seis concelleiros, por tres do BNG e dous do PSOE, tamén recollía que cada edil, en caso de ter dereito a iso, cobraría 400 euros por pleno, polos 200 que se pagaron o pasado mandato; 150 por xunta de portavoces, polos 100 actuais; 200 euros por xunta de goberno, fronte aos 250 actuais; 150 euros por comisións informativas, polos 100 de agora, ademais de 50 euros por oficiar en matrimonios, estando agora en 104 euros.
Ademais, tamén expuxeron que cada grupo obtería 400 euros ao mes, o dobre do que viñeron percibindo, cantidade fixada en 200 euros.
