O Concello de Santiago estudará "de urxencia" un sevicio de bus urbano que responda "ás necesidades dos veciños"
Sinalan que a xestión do servizo público de transporte urbano é "unha proba da ineficacia do goberno saínte do PSOE
Por E.P. | SANTIAGO DE COMPOSTELA | 01/07/2023 | Actualizada ás 18:50
O Goberno municipal de Santiago de Compostela avanzou que estudará "de urxencia" as posibilidades para atopar unha solución "que mellore o servizo de autobus urbano".
Destacan que a resolución do Tribunal Administrativo de Contratación Pública (TacGal) de estimar parcialmente tres recursos contra os pregos de contratación da xestión do servizo público de transporte urbano é "unha proba da ineficacia do goberno saínte do PSOE con claras repercusións negativas para o conxunto da poboación".
"Trátase dun obstáculo que atrasa a posta en marcha do novo servizo de transporte urbano", afean. Así, afirman que o Goberno local traballará "con toda a dilixencia" para arranxar o proceso da licitación do concurso co obxectivo de que o novo servizo de transporte "responda as necesidades dos veciños".
Lembran que o anterior goberno socialista iniciou a licitación do servizo de transporte público un mes antes das eleccións municipais tras "catro anos de inacción", "sen a mínima transparencia e sen o diálogo que esixe un contrato que ía ter un prazo de execución de 13 anos e un orzamento de 86 millóns de euros".
"Agora demóstrase que os pregos teñen numerosas carencias, froito da precipitación e das présas que lle entraron ao goberno en tempo de desconto do pasado mandato e sen atender as demandas dos veciños nin do persoal traballador para ofrecer un mellor servizo", explican.
Advirten ademais de que esta situación forma parte da débeda que deixou o PSOE, "da que o novo goberno local non é responsable e que tentará solucionar o máis pronto posible para ofrecer un mellor servizo de transporte público en Santiago".
