Explosivos de grupos terroristas e a Guerra Civil protagonizan unha mostra da Garda Civil en Santiago
A exposición, que conmemora o 50º aniversario do grupo de desactivación, poderase ver no Gaiás do 12 ao 15 de xullo
Por E.P. | SANTIAGO DE COMPOSTELA | 12/07/2023 | Actualizada ás 16:42
A Garda Civil inaugurou este mércores, no edificio Fontán da Cidade da Cultura, unha exposición do Servizo de Desactivación de Explosivos e de Defensa Nuclear, Radiolóxica, Biolóxica e Química (SEDEX-NRBQ) con motivo do 50º aniversario da súa fundación.
A mostra, que será itinerante, puxo en valor a historia deste grupo especializado en explosivos desde a súa creación, o 2 de marzo de 1973. Na mesma poderase observar a historia dos artefactos explosivos utilizados por grupos terroristas como os Grupos de Resistencia Antifascista Primeiro de Outubro (Grapo), o Exército Guerrilheiro, Resistencia Galega ou ETA, que coas súas accións fixeron que a Garda Civil crease este equipo de especialistas.
O responsable da comandancia da Coruña, o tenente coronel Jorge Bodelón, lembrou que esta forza padeceu 14 mortes e medio centenar de feridos de axentes en servizo en España desde o inicio de actividades deste grupo. Ademais, subliñou que este grupo de tarefas ampliou as súas funcións e que tamén están para previr as ameazas nucleares, radiolóxicas, biolóxicas e químicas, de aí as siglas NRBQ.
Na exposición poderase ver a evolución dos elementos e equipos, como traxes, máscaras ou robots, que utilizou este grupo. Unha das mostras máis rechamantes será o escaparate onde se exhiben a variedade de granadas de man utilizadas na Guerra Civil que, segundo explicaron os organizadores, "seguen atopando a día de hoxe" en todo o territorio nacional.
O acto de presentación foi presido pola subdelegada do Goberno na Coruña, María Rivas, que ironizou con "a imaxe que a miúdo se forma no imaxinario das persoas a través do mundo do cinema e a televisión". Por tal motivo, destacou a preparación, formación e profesionalidade deste grupo especializado da Garda Civil.
"A disciplina, a formación e a instrución son tan importantes ou máis que o valor. E niso a Garda Civil, as Forzas e Corpos de Seguridade do Estado, son exemplares", expresou a subdelegada.
A MULLER NO SEDEX
Doutra banda, a subdelegada recoñeceu na súa intervención a quen foi a única muller do SEDEX en España durante 11 anos, Begoña Sampedro. "Begoña foi capaz de romper barreiras e converterse nun referente para moitas mulleres", ponderou Rivas. Así mesmo, recoñeceu a histórica incorporación de dúas novas mulleres ao corpo e incentivou a que se somen novas aspirantes.
A EXPOSICIÓN
A exposición de medios e material da Garda Civil levará a cabo desde o 12 ao 15 de xullo na Sala de Eventos do Edificio Fontán en Santiago. A mostra contará cunha gran variedade de material deseñado especificamente para a desactivación de artefactos, así como outros dispositivos e traxes especiais utilizados polos axentes TEDAX da Garda Civil.
