O avogado do maquinista que levou o tren a Ourense: "A condena de Cortabitarte leva absolver a Garzón"
O xuízo afronta os seus últimos días entre esta semana e a que vén, tras máis de nove meses de vista oral
Por Europa Press / Redacción | Santiago de Compostela | 19/07/2023 | Actualizada ás 12:22
O avogado que representa ao maquinista Javier Illanes, que levou ata Ourense o tren Alvia accidentado en xullo de 2013 en Angrois, entende que "todas as circunstancias que levan á condena de --Andrés-- Cortabitarte --o ex director de seguridade de Adif procesado no xuízo polo sinistro ferroviario-- deberían levar á absolución de Garzón --o condutor tamén acusado de 80 homicidios e 145 delitos de lesións por imprudencia profesional grave--".
Así se pronunciou este letrado este mércores nunha nova sesión do proceso penal, que afronta os seus últimos días entre esta semana e a que vén, despois de máis de nove meses de vista oral. Unha vez finalice, a xuíza Elena Fernández Currás deberá decidir se ve responsabilidades nos dous homes aos que se atribúen os feitos, nun deles ou en ningún.
Javier Illanes, o maquinista que levou o tren Alvia desde Medina del Campo ata Ourense, declarou como testemuña ao comezo do xuízo, en outubro. Entón, afirmou que era "de dominio público" que a curva da Grandeira, onde descarrilou o convoi, estaba "desprotexida". Este extremo négano tanto o propio acusado de Adif como a Avogacía do Estado, que representa a esta empresa pública (e non a Renfe). "Todos e cada un dos feitos contidos no noso escrito de acusación foron acreditados", destacou o avogado de Javier Illanes este mércores durante a lectura do seu informe final.
"TIÑA O DOMINIO DO FEITO"
Neste sentido, explicou que pide "só a condena de Andrés Cortabitarte", o ex alto cargo de Adif, "por entender que tiña o dominio do feito e estaba na súa man evitar o accidente, fora cal fora o factor humano que puidese incidir na liña de alta velocidade". Así, observa un "claro feito causal entre a súa conduta imprudente" e "o catastrófico accidente".
En todo caso, a pena que piden para el non é a máxima, que si solicitan outras partes --catro anos de cárcere-- pois "se limita ás lesións" de Illanes ao non verse "lexitimados para solicitar penas por falecementos e lesións doutras vítimas".
"ALGO DEBEU APRENDER"
Na súa exposición, este avogado fixo alusión ás competencias de Cortabitarte como director de seguridade de Adif no seu día, e lembrou que foi perito no xuízo polo accidente do metro de Valencia. "Algo debeu aprender para que baixo o seu mandato non se producisen accidentes similares", reprochou.
