Detidas 15 persoas nas provincias da Coruña e de Lugo pola súa presunta participación en 40 roubos con forza
Entre os materiais requisados atópanse ferramentas, armas de fogo, pistolas simulada ou cable de cobre.
Por E.P. | Santiago de Compostela | 01/08/2023 | Actualizada ás 14:12
A Garda Civil detivo a 15 persoas, once homes e catro mulleres, nas provincias da Coruña e de Lugo pola súa presunta participación en polo menos 40 roubos con forza nos que subtraeron material por un valor superior aos 700.000 euros.
Segundo informou o Instituto Armado, estas detencións realizáronse no marco da operación Salvamorel, que se iniciou no mes de marzo. O equipo Roca da Garda Civil de Santiago detectou a presenza dalgún dos agora detidos nas inmediacións de naves industriais onde posteriormente se cometeron varios roubos.
Posteriormente, os investigadores comprobaron que detrás da comisión destes feitos atopábase unha armazón delituosa formada por un grupo con lazos familiares e base no poboado de O Carqueixo, en Lugo. A maioría dos investigados, destaca a Garda Civil, contaba cun amplo historial delituoso con antecedentes por roubos con forza e mesmo algúns deles con numerosas ordes de procura e detención.
Na madrugada do día 27 de xullo realizáronse simultaneamente oito rexistros en vivendas de diversas localidades das provincias da Coruña e Lugo. En Santiago e Betanzos levaronse a cabo dous rexistros, en Melide (A Coruña) os axentes entraron en dúas vivendas e en Lugo realizáronse outros catro rexistros en vivendas e no poboado de O Carqueixo, onde se interviñeron dúas escopetas presuntamente subtraídas na Coruña cos números de serie borrados.
COORDINACIÓN
Tal e como detalla a Garda Civil, os detidos actuaban coordinados en grupo. Normalmente desprazábanse en varios vehículos para detectar a presenza das patrullas de policía. Para non ser identificados no lugar dos feitos, subtraían vehículos que empregaban tanto para acceder ao lugar onde cometían os roubos como para darse á fuga sen temor a ser identificados.
Ademais, cando eran detectados polas patrullas policiais, "non dubidaban en fuxir a gran velocidade pondo o perigo a seguridade do resto de condutores", polo que tamén se lles imputan diversos delitos contra a seguridade do tráfico.
OBXECTIVO: NAVES INDUSTRIAIS
Os detidos cometeron roubos en toda a comunidade autónoma, principalmente nas provincias da Coruña e Lugo. Roubaron en naves e almacéns, en establecementos comerciais de maquinaria e ferramentas, en canteiras, en segundas vivendas situadas en zonas illadas ou en talleres mecánicos.
Ademais, fixéronse cun importante número de vehículos que utilizaban para cometer os roubos, principalmente dunha marca, un modelo no que se especializaron para vulnerar sistema de seguridade do aceso.
MATERIAL INTERVIDO
Nas intervencións nas vivendas dos detidos, os axentes atoparon numerosos efectos procedentes dos roubos: televisores, maquinaria, ferramentas, equipos de son, armas de fogo, pistolas simuladas, pneumáticos ou cable de cobre, entre outros.
