O Carballiño quere converterse na capital española do polbo
Impúlsase como destino gastronómico cun investimento dun millón de euros, co polbo como elemento cnetral.
Por Europa Press / Redacción | OURENSE | 11/08/2023 | Actualizada ás 17:58
Turismo de Galicia e o Concello do Carballiño asinaron este venres un convenio para a execución do Plan de Sustentabilidade Turística 'O Carballiño e a gastronomía do polbo', un convenio cun orzamento dun millón de euros e execución ata o 2025, para transformar o municipio en destino gastronómico.
O Director de Turismo de Galicia, Xosé Merelles, desprazouse ata a localidade ourensá, ás portas da celebración da LXI edición da Festa do Polbo de Carballiño --declarada de Interese Turístico Internacional--, para rubricar co rexedor municipal, Francisco Fumega, este convenio de colaboración encartado no Plan Territorial Enogastronomía de Galicia, que leva adiante a Xunta de Galicia para impulsar distintas zonas do territorio como destino gastronómico de referencia.
Así pois, o Director de Turismo de Galicia fixo fincapé no investimento con fondos europeos que se está levando a cabo neste concello e na contorna da comarca do Ribeiro.
Resaltou que se beneficia de dous plans deste tipo cun investimento total de 2,5 millóns de euros, "o que nos permite consolidar o territorio Ribeiro-O Carballiño como un destino turístico enogastronómico de referencia nacional", destacou antes de ensalzar a súa "oferta turística cohesionada, ordenada e coordinada para o conxunto do destino aproveitando o tirón do AVE".
En concreto, o proxecto no concello do Carballiño ten como obxectivo desenvolver "a identidade e o posicionamento" deste municipio como destino gastronómico sustentable referente en Galicia, concentrándose no polbo como elemento central da oferta turística.
