O PP de Santiago denuncia a sobrecarga da liña 6 e demanda un bus lanzadeira entre Aeroporto e Estación
Piden un autobus "directo, sen paradas e cun prezo adaptado ao servizo".
Por E.P. | Santiago de Compostela | 11/08/2023 | Actualizada ás 18:48
O PP de Santiago demandou un bus lanzadeira entre o Aeroporto e a Estación Intermodal que sexa "directo, sen paradas e cun prezo adaptado ao servizo".
Nunha nota de prensa, os populares composteláns demandaron que, "despois de coñecerse que haberá que esperar ata, polo menos o ano 2025, para contar cun novo contrato de transporte público", a liña 6 -que realiza a ruta Os Tilos-San Marcos- realice o seu traxecto ata a rotonda do aeroporto, sen entrar na terminal.
O concelleiro popular Adrián Vila afirmou que o PP se fai eco de "unha demanda veciñal", xa que co desdobramento da liña, os usuarios "perderon frecuencias e ata quedaron 'tirados' nas paradas posto que os autobuses saen do aeroporto totalmente completos".
Doutra banda, Vila tamén lamentou que os turistas "tarden máis en chegar de Lavacolla á Praza de Galicia que de calquera cidade de Europa a Santiago". Nesta liña, o concelleiro solicitou unha adaptación dos autobuses do aeroporto. Así, afirmou que "xa que se pagan 5.000 euros ao mes polo aluguer de cada autobús o razoable é que se aluguen adaptados, é dicir, con espazos habilitados para as maletas".
