Conde e Quintana declaran no Congreso un préstamo hipotecario de case 200.000 euros e oito vivendas, respectivamente

O que fóra vicepresidente primeiro da Xunta e conselleiro de Economía, Francisco Conde, e a exconselleira do Mar, Rosa Quintana, declaran no Congreso dos Deputados os salarios percibidos pola súa actividade no Goberno galego, así como varios bens inmobles e hipotecas. Así se desprende das declaracións de bens e rendas publicados polos que foran integrantes do Goberno galego con motivo da súa elección como deputados na Cámara baixa.

En concreto, o cabeza de lista do PP por Lugo informa dunha retribución bruta como conselleiro da Xunta de 70.806,48 euros. Así como 5.445,83 euros en concepto de dietas por asistencia ao consello de dirección do Instituto Galego de Promoción Económica (Igape) e outros 5.180,11 por dietas de asistencia ao Consello de Administración de Xes Galicia. O político lucense é propietario do 50 % dun piso en Madrid adquirido no 2015 e ten dúas contas correntes en sociedade de gananciales cun total de 8.491 euros. Conta cun plan de pensións con 25.096,61 euros, é propietario dun vehículo e ten pendentes 198.175,09 euros dun préstamo hipotecario.

A conselleira de Mar, Rosa Quintana, mira o reloxo durante a súa última sesión de control da cámara galega | Fonte: Álvaro Ballesteros - Europa Press

Pola súa banda, a que fóra conselleira do Mar durante máis dunha década en Galicia e actual deputada no Congreso por Ourense informa que recibiu 83.217 euros de rendementos de traballo. Declara un inmoble en Ourense e outro en Pereiro de Aguiar procedentes dunha herdanza, así como varias leiras rústicas tamén herdadas. Ademais, ten unha casa en pleno dominio en Brión e é propietaria do 50 % de inmobles en Brión, Ribeira, Sanxenxo, Ourense e Pereiro de Alén. A exconselleira ten dúas contas bancarias con 32.589 e 30.000 euros, é propietaria dun coche e ten dous préstamos hipotecarios con 25.271 e 9.914 euros pendentes.

O que concorreu como número un do PP pola provincia da Coruña e vicesecretario xeral de Organización do Partido Popular, Miguel Tellado, detalla de que ingresou entre xaneiro e xullo 20.229 euros de salario do Parlamento de Galicia e dá conta tamén 22.720 euros en concepto de gasto de representación do PP. Ademais, é propietario do 50 % dunha vivenda e dun garaxe en Ferrol, e ten o 7 % doutro piso herdado nesta cidade. Tellado, que foi secretario xeral do PPdeG, reflicte 23.000 euros en depósitos en contas correntes e plans de pensións; é propietario de tres vehículos e ten tres préstamos, un para a adquisición de vivenda do que ten pendentes 75.236 euros, e dous para a compra de vehículos dos que lle restan por pagar 12.600 euros e 14.357 euros.

Ademais, o que fóra portavoz parlamentario do PPdeG, Pedro Puy, declara recibir 53.879,66 euros do Parlamento de Galicia, así como 7.041,76 euros en concepto de trienios da Universidade de Santiago de Compostela (USC). É propietario do 66 % dunha vivenda familiar con leira na Coruña e do 9,7 % doutra procedente dunha herdanza. Informa de 32.487,09 euros en depósitos en contas de aforro, conta con 8.005,65 euros dun plan de pensións e é propietario dun vehículo. Ademais, declara un préstamo hipotecario do que quedan pendentes 1.727,09 euros.

DEPUTADOS SOCIALISTAS

Nas filas socialistas, o 'número un' do PSOE pola Coruña e ministro de Sanidade, José Miñones, informa de que recibiu 95.793 euros de salario da Delegación do Goberno e 3.840 euros en concepto de trienios da USC. Ademais, adquiriu en agosto de 2022 unha vivenda en Madrid da que é propietario do 50 % e dá conta de 73.545 euros en contas correntes. Ten pendentes 192.717,37 euros dun préstamo hipotecario

En canto á cabeza de lista do PSOE por Lugo e exdelegado do Goberno, José Ramón Gómez Besteiro, declara recibir 60.333 euros en honorarios de avogacía e informa de 374,61 euros en concepto de 'Rendementos de traballo Fremap Mutua'. É propietario dunha vivenda en Lugo adquirida no 2005 e dá conta de recibir por herdanza compartida a nuda propiedade de dous pisos, un almacén e un solar na cidade. Ademais, informa de catro contas correntes (dúas das que é titular ao 100 %, unha da que ten o 50 % e outra na que está autorizado) cun salto total de 240.473 euros. É propietario de dous vehículos e ten 47.388 euros acumulados no sistema de previsión profesional da mutualidade xeral da avogacía.

Pola súa banda, o que encabezou a candidatura socialista por Pontevedra, David Regades, recibiu 144.728 euros de salario como delegado da Zona Franca de Vigo e 3.580 euros en concepto de aluguer de vivendas (50 % gananciales). É propietario de tres pisos e dúas prazas de garaxe en Pontevedra e ten 20.000 euros en depósitos en contas correntes. Conta con accións en Refercos, S.L. por valor de 600 euros, é propietario dun coche e unha moto e informa de catro préstamos cun total de 224.298 euros pendentes (50 % gananciais).

A socialista que concorreu como número un por Ourense, Margarita Martín, detalla un soldo de 51.718 euros como funcionaria da Xunta, informa de dous pisos con praza de garaxe en Ourense e Pontevedra e teine 12.828,59 euros nunha conta. Ten un vehículo e quédanlle pendentes 20.471,86 euros dun préstamo persoal. Ademais, ingresou 27.356 euros tras unha sentenza.

DEPUTADAS DE SUMAR

A portavoz de Sumar e deputada da formación impulsada por Yolanda Díaz pola provincia da Coruña, Marta Lois, informa de que recibiu 74.846 euros das súas remuneracións procedentes da USC, da que é profesora; do Concello de Santiago, onde foi concelleira; e do Consello da Cultura Galega. Ten un piso na Coruña, dá conta de 11.500 euros en dúas contas correntes, un plan de pensións por valor de 7.900 euros e quédanlle pendentes 10.400 euros dun préstamo hipotecario concedido no 2007.

Pola súa banda, a parlamentaria de Sumar pola provincia de Pontevedra, Verónica Martínez Barbeiro, informa de que recibiu 98.246 euros de salario como directora xeral de Traballo, ten unha vivenda en Baiona, 8.300 euros nunha conta corrente, un vehículo e ten pendentes 214.194,98 euros dunha hipoteca.

NÉSTOR REGO (BNG)

Por último, o deputado do BNG no Congreso, Néstor Rego, recibiu 7.284 euros de antigüidade da Consellería de Educación, dá conta dunha vivenda na Coruña, así como da herdanza do 50 % de tres vivendas en Lugo, de 52 parcelas de monte ou cultivo e de dúas leiras. Ten 27.138 euros nunha conta de aforro, 34.935 nun plan de pensións, dous coches e unha moto, así como participacións e accións en Tempo Galicia e Sermos Galicia, respectivamente. Ten pendentes 184.062 euros dun préstamo hipotecario concedido en agosto de 2020.