Os concellos galegos de menos de 5.000 habitantes reciben uns 374 euros por habitante máis que os que superan os 50.000

A Rede Localis, Rede de Administración Local, conclúe nun estudo que os municipios galegos son cada vez máis dependentes de transferencias autonómicas e estatais. Os ingresos que realizan outras administracións públicas para os gastos correntes dos concellos galegos, na súa maior parte transferencias da Administración autonómica e da Administración Xeral do Estado, recollen un incremento de 186 euros por habitante entre 2010 e 2021. A dotación media asignada aos concellos galegos en 2021 foi de 576 euros.

Dos 576 euros transferidos por habitante en 2021, 203 proceden da administración do Estado e 284 da Comunidade Autónoma de Galicia. Os municipios das provincias de Ourense e Lugo son os máis beneficiados na transferencia de capital.

A medida que se reduce o número de residentes do municipio, a dotación per cápita doutras administracións públicas aumenta. "Este resultado é o esperable, xa que, aínda que a capacidade fiscal destes concellos sexa notoriamente menor (polas bases impoñibles ou a renda dos seus habitantes) deben prestar obrigatoriamente unha serie de servizos mínimos. Non podemos esquecer que o actual deseño das transferencias correntes aos concellos, que non dependen do seu esforzo fiscal, ten un claro compoñente redistributivo, por iso é polo que se beneficia máis, en termos por habitante, aos municipios de menor poboación", explica a Rede Localis. En 2021, os concellos de ata 5.000 habitantes, recibían máis ou menos 374 euros máis por habitante que os concellos de máis de 50.000 habitantes.

Na última década, os concellos galegos obteñen entre o 42 % e o 47 % dos seus ingresos non financeiros a través de transferencias correntes e outras entidades. Polo que respecta á achega das transferencias de capital a porcentaxe oscila entre o 27 % e o 14 %. Agregando ambos os indicadores, o peso das transferencias con relación aos ingresos non financeiros pasou de representar o 69 % en 2010 ao 61 % en 2021.

En 2021, os concellos da provincia ourensá recollen unha dotación en transferencias correntes (697 euros) e os de Lugo (662 euros) moi superior aos de Pontevedra (387 euros). Esta repartición pode deberse ao menor tamaño poboacional dos concellos destas dúas provincias polos criterios utilizados a nivel autonómico e local. Esta nota número 25 do Observatorio Municipal Galego é unha das actividades da Cátedra do Bo Goberno Local da Universidade de Vigo, elaborada por Alberto Vaqueiro, codirector de Rede Localis.