A prolongación da autovía Santiago-A Estrada entre a Ramallosa e Pontevea comezará en outubro
O obxectivo do Goberno galego con estas actuacións é facilitar a comunicación e a vertebración territorial entre Santiago e a comarca de Tabeirós-Terra de Montes, reducindo os 10 minutos os tempos de viaxe entre A Estrada e a capital de Galicia.
Por Europa Press / Redacción | SANTIAGO DE COMPOSTELA | 15/09/2023 | Actualizada ás 14:06
A Xunta asina o contrato das obras do primeiro tramo da prolongación da autovía Santiago-A Estrada (AG-59), entre A Ramallosa e a estrada AC-241, en Pontevea, que empezarán a executarse en outubro. A conselleira de Infraestruturas e Mobilidade, Ethel Vázquez, presidiu este venres en Santiago de Compostela o acto de firma entre a Xunta e a UTE adxudicataria, formada por Vías e Construcciones S.A. - Movemento de Áridos e Construcións de Arousa, S.L. (Marconsa).
Neste acto, do que informou a Xunta nun comunicado, participaron o director da Axencia Galega de Infraestruturas, Francisco Menéndez; o alcalde da Estrada, José López Campos, e a alcaldesa de Teo, Lucía Calvo. As obras foron adxudicadas por un importe de máis de 27,2 millóns e contan cun prazo de execución de 20 meses. Trátase da firma do contrato que permitirá habilitar 3,5 novos quilómetros de prolongación da AG-59 entre A Ramallosa e Pontevea, no concello Teo, para darlle continuidade ao tramo da autovía libre de peaxes que xa se atopa en servizo.
A Xunta, de maneira paralela, continúa a avanzar no proxecto de construción das obras da segunda fase de prolongación da autovía, que serán 4 quilómetros máis entre Pontevea e O Rollo, xa no municipio da Estrada. O segundo tramo proxectado, cun investimento estimado de 34 millóns, unirá a ligazón da AC-241, en Pontevea, coa PO-841, chegando ata O Rollo, xa no concello da Estrada, tamén de maneira paralela á estrada autonómica.
O obxectivo do Goberno galego con estas actuacións é facilitar a comunicación e a vertebración territorial entre Santiago e a comarca de Tabeirós-Terra de Montes, reducindo os 10 minutos os tempos de viaxe entre A Estrada e a capital de Galicia. A infraestrutura busca, tamén, incrementar a competitividade do municipio da Estrada, sede de importantes institucións como a Academia Galega de Seguridade Pública, do Centro Integrado de Emerxencias 112 e do 061, e cunha grande actividade económica e empresarial.
