Os alcaldes de Valdeorras apoian aos traballadores afectados polo desaloxo da louseira Samaca
Os rexedores e rexedoras estudarán posibles accións de mobilización social para apoiar aos traballadores e evitar o peche da compañía.
Por E.P. | SANTIAGO DE COMPOSTELA | 19/09/2023 | Actualizada ás 19:47
Os alcaldes e alcaldesas da comarca de Valdeorras os alcaldes e alcaldesas da comarca (A Rúa, A Veiga, Carballeda de Valdeorras, Larouco, O Barco de Valdeorras, O Bolo, Petín, Rubiá e Vilamartín de Valdeorras) expresaron de forma unánime o seu apoio ao sector da lousa e aos traballadores afectados pola decisión xudicial de proceder ao desafiuzamento dos terreos nos que se atopa unha das empresas máis relevantes do sector na comarca.
Nun comunicado conxunto, os rexedores sinalan que, a pesar de que respectan a independencia xudicial, queren pór de manifesto as "gravísimas consecuencias que esta decisión vai ter para o futuro da comarca" posto que "pon en perigo centos de postos de traballo directos e miles indirectos". "Está en xogo o sustento de moitas familias da zona", avisan.
Os rexedores e rexedoras estudarán posibles accións de mobilización social para apoiar aos traballadores e evitar o peche da compañía. "Tras unha decisión aparentemente normalizada que puña fin á posible expropiación dos terreos, ningún erro burocrático, humano ou técnico pode ser escusa para pór en perigo o futuro da comarca", lamentaron os rexedores.
DESALOXO
Este martes, uns 230 traballadores protestaron ante o Concello do Barco de Valdeorras despois de que a Garda Civil executase á primeira hora da mañá unha orde de desafiuzamento da louseira Samaca.
Axentes da Garda Civil acudiron ás instalacións desta e outra louseira, Irosa, como acompañamento á comitiva xudicial, segundo informan a Europa Press fontes deste corpo. Por parte dos traballadores, o portavoz de CIG na comarca, Paco Moral, asegurou en declaracións a Europa Press que conseguiron "parar" o desaloxo de Irosa, pero non así con Samaca.
