Covadonga D'lom, activista contra a gordofobia: "Non creo que haxa unha soa muller que estea contenta co seu corpo"
O Consello da Cultura Galega e a Valedora do Pobo organizan unha xornada sobre a violencia estética, "a presión por encaixar nun cánon: o da muller nova, delgada, e branca".
Por Europa Press / Redacción | SANTIAGO DE COMPOSTELA | 22/09/2023 | Actualizada ás 14:56
O Conselllo da Cultura Galega, en colaboración coa Valedora do Pobo, celebra este venres unha xornada ao redor da gordofobia que contou coa participación Covadonga D'lom, activista contra a gordofobia e autora de Curvy, novela ilustrada sobre a súa experiencia como "gorda". "Non creo que haxa unha soa muller contenta co seu corpo", lamentou durante a súa intervención.
En 2016, cando se publicou o libro, explicou na súa conversación con Inma López Silva, ninguén falaba da gordofobia e D'Lom fíxoo desde o sentido do humor da súa propia experiencia persoal, algo que lle colevou certas críticas ("que se cosificaba, que tiña un complexo sen superar e que se vende ao capital"). "Hoxe quizais, no canto de facer humor desde o eu, igual faríao desde o que se burla", concede, "sobre a gordofobia en si, e non sobre corpos gordos (...). Quedáronseme moitas cousas no tinteiro por non ser politicamente correcta", recoñeceu.
Nesta liña, reflexionou que "aínda que se debería poder facer humor do noso corpo se queremos, xa que é noso, estamos nunha cultura moi complicada". "Son mofan do humor negro e hoxe caemos moito na literalidade, en non entender os matices. Corremos o risco de que a distancia que dá a ironía ou o sarcasmo, non se entenda. Creo que hoxe en día o coidaría moito máis", comentou.
"Tanto positivismo vai creando unha pota a presión que moitas veces acaba por explotar", continuou. Nesta mesma liña de como abordar o problema, considera que en tempos de linguaxes simples e efectistas, propios das redes sociais, é necesaria unha aproximación máis teórica que permita profundar nas causas e as consecuencias da gordofobia e a violencia estética.
A gordofobia, indicou, chega a todos os ámbitos da sociedade, pero está especialmente presente na industria da moda. "Parece un mérito entrar en Zara e caber. A industria da moda é deshonesta e fomenta o odio aos corpos, sexan como sexan estes", aseverou a escritora que, exemplificándoo na súa propia experiencia, sinalou que por exemplo, en moitas tendas as tallas grandes só se poden comprar en liña e non en tenda física. Esta discriminación, continuou, é tamén unha cuestión de clase; un rumbo social que se reflicte desde moitos prismas: a alimentación ("estar delgada é caro"), a vestimenta (a roupa de tallas grandes é máis cara), e a saúde en xeral ("estar sa tamén é caro").
GORDOFOBIA E SAÚDE
A relación entre gordofobia e saúde foi outro dos eixos da conversación. "Que é un corpo san?, o Índice de Masa Corporal?", preguntouse D'lom, que considera que desde as propias consultas médicas existe aínda unha "sobreestimación do que é estar san" e unha transmisión dunha preocupación "excesiva" polo que se come. "Entras nunha consulta e o primeiro que che din, aínda que vaias por un catarro, é que tes que adelgazar", lamenta.
Con todo, a escritora precisou que non se trata de xustificar os problemas de saúde relacionados coa obesidade, "que existen e débense tratar", pero indica que pór o foco nos posibles problemas sanitarios das persoas gordas, é tamén unha mostra da gordofobia. "Hai persoas moi delgadas que se alimentan de graxas saturadas que lles dan a enerxía xusta para manterse en pé, e non pomos tanto o foco aí", argumentou.
A gordofobia, concluíu, é outro trazo do contexto patriarcal no que se enmarca a sociedade actual. "Non creo que haxa unha soa muller que estea contenta co seu corpo (...). O problema é que o corpo da muller é un obxecto do que se pode falar e opinar, non como o dos homes", censurou.
APROXIMACIÓN TEÓRICA
A aproximación teórica da que falaba D'lom é un dos obxectivos da xornada organizada polo CCG e a Valedora do Pobo. A presidenta do Consello, Rosario Álvarez, e a propia Valedora, Maria Dores Fernández Galiño, inauguraron o foro de debate celebrado na sede do CCG.
Álvarez tachou este tipo de discriminación de "doenza social que debemos solucionar entre todos", matizando ademais que "non se pretende invisibilizar os problemas de saúde relacionados", senón pór o foco nun tipo de discriminación "intolerable" por "non entrar nun canon que non sabemos de onde sae".
Tanto Álvarez como Galiño coincidiron ao apuntar que ten un compoñente de xénero, aínda que afecte a todos. "É un tipo de segregación que entraña violencia social, institucional, laboral e médica. E que carrexa ademais un gran sentimento de culpa", comentou. Apuntou ademais que a lei española aínda non recolle a gordofobia como causa de discriminación.
