O grupo de memoria histórica da USC escavará novas fosas franquistas en Viana do Bolo, Oza-Cesuras e Narón
O plan do equipo enfócase á fosa de Santa María de Pradocabalos (Viana do Bolo) e aos cemiterios de San Salvador de Trasanquelos (Oza-Cesuras) e de Santa María do Val (Narón).
Por Europa Press / Redacción | SANTIAGO DE COMPOSTELA | 27/09/2023 | Actualizada ás 18:48
O equipo de memoria democrática da Universidade de Santiago de Compostela levará a cabo traballos de localización, exhumación e identificación de vítimas asasinadas polo franquismo en fosas de Viana do Bolo, Oza-Cesuras e Narón. O grupo está integrado por historiadores, antropólogos forenses, arqueólogos e xenetistas que profundan no pasado de violencia en Galicia e que xa realizaron exhumacións de fosas en Vilagarcía, Crecente, Celanova, Lousame, A Capela e Serantes (Ferrol).
Agora, o plan do equipo enfócase á fosa de Santa María de Pradocabalos (Viana do Bolo) e aos cemiterios de San Salvador de Trasanquelos (Oza-Cesuras) e de Santa María do Val (Narón). "Seguimos actualizando o mapa de fosas de Galicia, para realizar nos próximos anos a maior cantidade de exhumacións dos enterramentos de asasinados pola violencia franquista", explicou Histagra nun comunicado da USC. Deste xeito, fan un chamamento ás persoas que queiran exhumar ou investigar fosas relacionadas co franquismo a achegar información respecto diso a través do correo electrónico 'histagra@usc.es'.
