As 'startups' galegas mostran na Pont-Up Store de Pontevedra o seu potencial innovador e creativo
O encontro de emprendimiento Pont-Up Store arrincou este venres en Pontevedra baixo a lema 'Xeración Emprendedora' e presentando as iniciativas de 32 novas empresas. A internacionalización, o emprendemento musical e a mercadotecnia sensorial son algúns dos eixos temáticos sobre os que pivotará este décimo aniversario da feira que este ano inclúe unha gala.
Por Europa Press / Redacción | PONTEVEDRA | 29/09/2023 | Actualizada ás 16:35
O encontro de emprendemento Pont-Up Store arrincou este venres en Pontevedra baixo o lema 'Xeración Emprendedora' e presentando as iniciativas de 32 novas empresas de nova creación ou 'startups' e un programa de actividades repartidas por distintas localizacións da cidade nas que van participar preto de cen entidades. A internacionalización, o emprendemento musical e a mercadotecnia sensorial son algúns dos eixos temáticos sobre os que pivotará este décimo aniversario da feira que este ano inclúe unha gala.
No acto de apertura participaron o alcalde de Pontevedra, Miguel Anxo Fernández Lores, a vicerreitora do Campus de Pontevedra da Universidade de Vigo, Eva Lantarón; o vicepresidente da Deputación de Pontevedra, Rafa Domínguez; o secretario xeral de Emprego, Traballo Autónomo e Economía Social, Pablo Fernández; e a vogal do Estado para representar ao Consorcio Zona Franca de Vigo, Ana Mejías Sacaluga; entre outras autoridades.
Os responsables da organización da Pont-Up Store explicaron que o papel deste evento é "potenciar o talento dunha Galicia xeradora de riqueza, innovadora e creativa, que consolida no país un futuro mellor, sustentable e igualitario" e destacaron que a "simbiose coas dinámicas innovadoras da propia cidade" de Pontevedra "incrementan o valor total do Pont-Up Store e a súa capacidade para atraer emprendementos de toda Galicia". Para esta décima edición, a carpa situada na Praza de España acolle a 32 startups galegas, das que o 60 % proceden da provincia de Pontevedra e un 75 % están lideradas por mulleres.
O compromiso ambiental está presente en case todas as iniciativas. Tamén destaca o ámbito das consultorías, as enxeñarías, o coidado persoal, as propostas educativas, o téxtil, os complementos, a decoración, o turismo e o sector da alimentación. Unha das actividades máis atractivas é o "Puntazo Exprés", onde os emprendedores fan presentacións de cinco minutos de duración a un xurado integrado por empresarios de éxito. Pola súa banda, a Xunta de Galicia dará difusión no recinto aos seus programas de fomento do emprendemento feminino e da economía social.
GALA DÉCIMO ANIVERSARIO
Ademais, haberá unha Gala 10º Aniversario que se celebrará o sábado, a partir das 19 horas, no palco da carpa na que actuarán Ornitorrincos, Sofie Peries, Furious Monkey House e Zeltia Irevire, entre outros.
Dentro das celebracións especiais do X aniversario, está tamén a exposición instalada na Casa das Campás e está programada unha charla do xornalista Juanma Romeu baixo o títjulo 'O poder da comunicación auténtica e convincente: Faite visible e serás imprescindible'. Será na Casa das Campás o sábado 30, a partir das 12.00 horas.
O sábado tamén terá lugar unha mesa sobre emprendemento en economía social e innovación, mentres que unha trintena de emprendedores de toda Europa participarán nun encontro no IES Valle Inclán, enmarcada no programa europeo Erasmus+.
