Novo colapso nas urxencias do Chus: case 500 persoas e padiolas polos corredores
A Xerencia recoñece que o luns se "retardou" o proceso de ingresos, pero destaca que este martes a situación "está a normalizarse".
Por Europa Press / Redacción | Compostela | 03/10/2023 | Actualizada ás 18:40
O servizo de urxencias do Hospital Clínico de Santiago tivo na tarde do luns un episodio de alta demanda de pacientes --450 persoas atendidas-- polo que, segundo denuncia unha asociación de usuarios, houbo varias cadeiras de rodas e padiolas "nos corredores de accesos" esperando a ser atendidas.
Segundo a Asociación de Pacientes e Usuarios do CHUS (Complexo Hospitalario Universitario de Santiago), produciuse outro "colapso" no que se vulneraron os dereitos á "intimidade e dignidade". De acordo co seu relato, a situación "foi emporando" ata que ás 15,21 horas eran 24 pacientes "graves".
Este colectivo, que difundiu un vídeo da situación a través de redes sociais, culpa desta saturación --que "debería ser excepcional", pero está "a converterse en normalidade", asegura-- á Xerencia do CHUS pola súa "incapacidade" de xestión. Tamén a acusan de facer "caso omiso" xa non só das "denuncias públicas", senón tamén "das múltiples reclamacións presentadas" polos pacientes e polos requirimentos de Inspección de Traballo.
ESTE MARTES, "ESTÁ A NORMALIZARSE"
Pola súa banda, fontes da Xerencia da área sanitaria de Santiago consultadas por Europa Press recoñecen o repunte vivido o luns: as urxencias do Clínico atenderon a 450 persoas cando a media diaria anterior á pandemia de covid-19 era duns 370. Este martes, a situación "está a normalizarse".
Este pico "retardou o proceso de ingresos en planta", tal e como admiten as mesmas fontes, que defenden non obstante que aqueles doentes críticos --os que son clasificados como de prioridade 1 en triaje-- son atendidos "de maneira inmediata" e "non esperan".
