O feminismo galego sae á rúa para clamar contra o crime machista de Viveiro: "Querémonos libres e vivas!"

Colectivos feministas de toda Galicia saíron á rúa este venres pola tarde, convocados pola Marcha Mundial das Mulleres, para manifestar a súa rotunda repulsa polo asasinato machista de Rejane perpetrado o mércores en Viveiro. En máis dunha vintena de municipios, incluído onde ocorreu o crime, deuse lectura dun manifesto no que se proclama: "O machismo mata, nin unha menos! Querémonos libres e querémonos vivas!".

A través deste texto, as e os manifestantes lembraron que, co de Rejane na localidade viveirense de Covas, en 2024 houbo cinco "feminicidios oficiais" na Comunidade galega. Desde 2010, foron xa máis de 70 asasinadas. "Hoxe é a quinta vez este ano que nos mobilizamos contra os feminicidios en Galicia. Cinco asasinatos machistas en doce meses, cinco vidas que foron arrebatadas, catro fillos vítimas de violencia vicaria. E non é suficiente, non é suficiente para que as institucións vexan que hai que reformular como se atende a violencia, como se avalía, como non funcionan as políticas contra a violencia de xénero das que tanto se encomian", expresa o manifesto.

A Marcha Mundial das Mulleres dirixe especialmente as súas críticas á Xunta porque a súa "decisión" tras o asasinato de Rejane foi "decretar un minuto de silencio". "Cada vez importa menos o terrorismo machista que arrasa as nosas vidas. As institucións ponse de perfil e fan rituais puramente estéticos que demostran o cero vontade política de atallar un problema que é estrutural e que non vai desaparecer se non se toman medidas que vaian ao fondo da cuestión", advirte o colectivo. E é que "cada feminicidio é un fracaso do sistema" que fai necesario "un cambio de rumbo" a través de maior investimento e maiores accións "pola erradicación o machismo en todas as súas formas".

Manifestación pola igualdade de xénero convocada pola Plataforma Feminista Galega e Marcha Mundial das Mulleres no 8M | Fonte: M. DYLAN - Arquivo