Obradoiros de cociña creativa para nenas e nenos
«Pequenos grandes chefs» celebrarase todos os martes e xoves do mes de xuño na sede de Afundación en Santiago. A profesora, Vanessa Sende Cardoso, busca achegar a cociña aos máis cativos dun xeito divertido e pedagóxico.
Por GC Tendencias | Santiago de Compostela | 27/05/2015 | Actualizada ás 14:41
A Fundación Galicia Obra Social (Afundación) presenta a súa nova proposta de cursos de cociña, dirixidos nesta ocasión a nenas e nenos de 5 a 12 anos, que se desenvolverán na sede da entidade en Santiago (rúa do Vilar, 19) en dúas quendas, os martes ou os xoves, desde o 2 ao 25 de xuño, en horario de 17.00 a 19.00 h. As inscricións xa se poden realizar a través de www.ataquilla.com ou no teléfono 902 504 500.
«Pequenos grandes chefs», impartido por Vanessa Sende Cardoso, pretende achegar os participantes ao mundo da cociña dun xeito didáctico e divertido. Así, ademais de prepararen as distintas receitas propostas, as nenas e nenos aprenderán as normas de seguridade na cociña, como manexar os alimentos e utensilios, os hábitos recomendados de hixiene e limpeza, a importancia de consumir alimentos sans e nutritivos ou a importancia do traballo en equipo.
Durante o curso, estruturado en catro sesións de 2 horas de duración, repartidas en dous turnos os martes ou os xoves, prepararán, entre outras receitas, paté mariñeiro con galletiñas de tomate; sabores do mundo con quiche Lorraine, Tabuleh ou hamburguesas; comida para ir á praia: mini empanadas, canelóns de ensalada rusa ou tortilla de verduras ao forno e receitas para todos: para persoas con intolerancia á lactosa ou ao glute, para vexetarianos etc. Nas distintas xornadas amosaranse tamén novos xeitos de presentar os pratos e, ao rematar cada sesión, os participantes levarán o que cociñaron e tamén as distintas receitas, para que as poidan poñer en práctica na casa.
