Setex Aparki obrigada a pagar ao Concello de Santiago case 700.000 euros pola liquidación do contrato do guindastre
A empresa foi concesionaria deste servizo desde 2012 ata o 2015 cando o contrato quedou anulado e no 2018 produciuse a remunicipalización do mesmo baixo o mandato de Compostela Aberta.
Por E.P. | SANTIAGO DE COMPOSTELA | 19/10/2023 | Actualizada ás 17:33
Un xulgado compostelán desestimou o recurso presentado pola empresa Setex Aparki contra o pago de case 700.000 euros ao Concello de Santiago polo canon non abonado, os intereses e outros conceptos xerados tras a liquidación do contrato da ORA e o guindastre municipal.
Nun auto ao que tivo acceso Europa Press, e contra o que cabe recurso ante o TSXG, o Xulgado do Contencioso Administrativo número 1 de Santiago rexeita as alegacións da empresa e determina que debe abonar ao concello 677.379,58 euros, como este reclamáballe.
Esta cantidade fai referencia ao canon variable --menos o IVE-- correspondente ao total gastos derivados da prestación obxecto da concesión e á retribución variable da concesionaria.
A empresa foi concesionaria deste servizo desde 2012 ata o 2015 cando o contrato quedou anulado e no 2018 produciuse a remunicipalización do mesmo baixo o mandato de Compostela Aberta.
A remunicipalización da ORA e o guindastre foi unha das promesas electorais de Compostela Aberta nas municipais de 2015 e comezou a exporse cando unha sentenza do TSXG de outubro de 2015 declarou "sen efecto" a adxudicación contractual do servizo a Setex Aparki, xa que entendía que esta non actuaría "de boa fe" no concurso público.
