O centro de innovación da FP de Ourense ten iniciativas de fomento de robots con utilidade ambiental

A directora xeral de Formación Profesional, Eugenia Pérez, reivindicou a "ampla actividade" que desenvolve o centro galego de innovación neste ámbito situado en Ourense, a pesar do seu "curto período de vida". Así, en menos dun ano, destacou, a preguntas do PP en comisión, que está "a desenvolver unha folla de ruta" con "unha ampla actividade" e en concreto "actuacións en catro áreas".

Como mostra de proxectos concretos, a directora xeral mencionou tres de I+D postos en marcha (un de economía circular relacionado coa auga para converter residuos en recursos de alto valor engadido, outro para dar servizos innovadores a empresas de gastronomía, enoloxía e turismo e o terceiro para atopar solucións que aproveiten as correntes de aire en vehículos eléctricos) e tamén apuntou a dous que se uniron recentemente.

Estas últimas son iniciativas, segundo explicou, de fomento de robots con utilidade ambiental (contra incendios, inundacións, etcétera) e para o deseño de vestiario e novos materiais para profesionais do mar, na que está implicada, entre outras, Roberto Verino.

Alfonso Rueda, durante a súa visita ao Centro de Innovación de FP de Ourense | Fonte: XUNTA DE GALICIA