Correos adica un selo ao edificio do antigo convento de San Francisco de Ourense no seu centenario como BIC

O Arquivo Histórico Provincial de Ourense acolleu este mércores a presentación dunha estampa que Correos dedícalle a este edificio, o antigo convento de San Francisco, coincidindo co centenario da súa declaración como Ben de Interese Cultural (BIC). No acto participaron o rexedor, Gonzalo Pérez Jácome, o director do Arquivo Histórico Provincial, Pablo Sánchez Ferro, o subdelegado de Defensa, Jesús Antonio Penas Preckler, e a directora de Relacións Institucionais de Correos, Nuria Lera. Con este selo, Correos quere contribuír a pór en valor a historia e a beleza arquitectónica desta edificación, que será "un pequeno embaixador da cidade e do seu excelente patrimonio" a través deste selo, dixo Pablo Sánchez, director do Arquivo Provincial.

A foto do arquivo que se emprega neste selo realizouna un técnico do propio edificio, Francisco Sandoval, o que "foi a forma do Arquivo Provincial de participar no selo". Ademais, o director aproveitou a ocasión para trasladarlle ao rexedor unha vella reivindicación, "facer algo coas ruínas da igrexa do convento que foron trasladadas ao parque de San Lázaro". "Non vén de agora, senón de anos atrás e se cadra hai unha forma de facer algo", manifestou. "Ourense é unha capital de provincia que dicimos que é a Cincenta de España e de Galicia", dixo o alcalde, que agradeceu a visibilidade que outorgará ao pasado histórico da urbe este selo.

Pérez Jácome dixo sentirse "orgulloso" da reforma do Arquivo Provincial, pero lamentou que "cando se toma unha decisión non se deixa de abortar outras". "Sempre que vexo isto penso que excelente Parador Nacional sería", engadiu. Ademais, o alcalde recolleu a petición do director do Arquivo Provincial, asegurando que tomará nota e o Concello colaborará en todo o que poida, aínda que sinalou que "hai funcións que non pode facer unha administración pobre, como é o Concello de Ourense", se non que "debe ser a Xunta de Galicia e o Estado Español".

Pola súa banda, o subdelegado de Defensa encargouse de destacar o pasado do edificio como cuartel e de celebrar o seu centenario como declaración BIC, unhas palabras que continuou a directora de Relacións Institucionais de Correos, asegurando que pretenden pór o seu "graniño de area" para promocionar e difundir "a singularidade sen parangón do edificio". O selo pertence á serie patrimonio artístico, conta cunha tirada de 125.000 exemplares e un valor por unidade de 1,65 euros. Pódese adquirir nas oficinas de Correos, en Correos Market ou a través do servizo filatélico da compañía.

Correos dedica un selo ao antigo convento de San Francisco de Ourense | Fonte: Europa Press