Hostaleiros de Santiago, como a oposición, reclaman a retirada da instrución técnica de medidas de seguridade
Reclaman ao Concello que escoite as súas demandas e que emende "as lecturas erróneas da realidade".
Por Europa Press / Redacción | SANTIAGO DE COMPOSTELA | 18/11/2023 | Actualizada ás 19:14
A Asociación Hostalaría Compostela, a Asociación Bares, Pubs e Discotecas Compostela e Hostalaria.gal reclaman ao Concello de Santiago a retirada da instrución técnica de medidas de seguridade en locais de hostalaría e de lecer da capital galega. Nun comunicado conxunto, os hostaleiros demanda ao Executivo de Goretti Sanmartín que escoite as súas demandas e que emende "as lecturas erróneas da realidade".
Así, piden revogar a Instrución 2/2023 e actuar con dilixencia na reapertura dos locais pechados. Cren que o goberno local debe velar para que o departamento de Urbanismo actúe con criterios "racionais e sensatos", aplicando a lexislación vixente e corrixindo "interpretacións restritivas e unha filosofía sempre lesiva para os negocios".
OPOSICIÓN
Deste xeito, súmanse ás declaracións da oposición, que consideran "acertadas", posto que apuntan que "recollen unha criminalización do sector en base a un estado de alarma creado para xustificar actuacións que non se corresponden co obxectivo que din buscar".
Segundo declarou este xoves o portavoz do PP local, Borja Verea, esta instrución crea "un clima de hostilidade e desconfianza" cara ao sector e acusou os nacionalistas de "pór na diana a todos os restaurantes, bares e cafetarías como presuntos delincuentes" que "requiren unha vixilancia especial".
Tras estas palabras, o concelleiro de Urbanismo de Santiago, Iago Lestegás, sinalou que resulta "sorprendente" que Verea "cuestione unha instrución elaborada por técnicos do servizo de licenzas e disciplina, que ten por obxectivo exclusivamente verificar o cumprimento das normativas autonómica e estatal en materia de seguridade e de prevención de incendios".
CRÍTICAS A URBANISMO
Para os hostaleiros, estas declaracións do concelleiro de Urbanismo son "desafortunadas" e "non contribúen a crear o clima propicio para unha solución adecuada". "Parece que non leu a Instrución e que descoñece a situación do sector. O concelleiro de Urbanismo ten que deixar de alimentar artificialmente o alarmismo social e pór solución ao colapso de licenzas que acumula o Departamento", reprochan.
Agora, o tres asociacións compostelás de maneira unificada, ademais de reclamar a "inmediata" convocatoria da mesa sectorial, solicitarán unha reunión co catro forzas políticas que forman parte da corporación municipal.
