Por Europa Press / Redacción | Santiago | 21/11/2023 | Actualizada ás 15:37
Os avogados e procuradores iniciaron este martes a súa folga indefinida en reclamación de melloras nas contraprestacións que reciben por exercer a obrigatoria quenda de oficio tanto desde o punto de vista económico como en materia de conciliación laboral ou responsabilidades burocráticas. "Este é o preito das nosas vidas e ímolo gañar", proclamaron desde a concentración de Santiago.
O da capital e o resto de xulgados galegos rexistraron concentracións ás 12,00 horas deste martes, no que os paros motivaron a suspensión de decenas de procedementos convocados para a xornada inaugural desta folga a nivel estatal que procuradores e avogados cualifican de "histórica".
"Por primeira vez, os avogados e procuradores, unidos, decidimos exercer con carácter indefinido o dereito fundamental á folga", proclamaron no manifesto lido ás portas do edificio xudicial de As Fontiñas, en Santiago de Compostela.
Os portavoces do colectivo, que suma a uns 3.000 profesionais en toda Galicia, agradeceron a comprensión e colaboración co exercicio do dereito a folga por parte de xuíces, letrados da administración de xustiza e Fiscalía.
A portavoz do sindicato Venia en Galicia, Rosa Lorenzo, destacou o seguimento "masivo" da xornada con "decenas" de procedementos, actos e vistas suspendidas en case todos os xulgados de Galicia.
Procuradores e avogados demandan á Xunta, que ten delegadas as competencias na prestación da asistencia de xustiza gratuíta, que se eleve a prestación económica que perciben pola quenda de oficio, considerada unha "indemnización", termo que consideran unha "humillación" e que ven como "herdeiro dunha concepción decimonónica" da profesión "que xa non encaixa coa realidade".
"Estivemos parados durante demasiado tempo créndonos instalados nunha posición de privilexio profesional e social que hoxe non corresponde con realidade. O primeiro paso para cambiar este rumbo é recoñecer esta realidade e, o segundo, que o damos hoxe, decidindo unirnos e reivindicar aquilo que historicamente se nos negou", aseveraron en Santiago.
Apelan a "reformular" a "realidade profesional e social" da Avogacía e da Procuradoría, un proceso no que piden que se implique a administración, á que afean que descartase fixar servizos mínimos para esta convocatoria, o que ven como unha mostra de que non consideran que a quenda de oficio supoña un "traballo".
Así, reivindicaron que a quenda de oficio foi cuberto con "o esforzo", "a dedicación" e "os medios" de procuradores e avogados como un servizo á cidadanía que esixen que se recoñeza. "Nunha situación escandalosa e urxente, somos cidadáns e reclamamos un recoñecemento dos nosos dereitos laborais e sociais máis básicos", aseveraron desde a capital galega.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.