A alcaldesa de Betanzos acusa á Xunta de "desviar a atención" sobre a orixe do brote de gastroenterite

A alcaldesa de Betanzos, María Barral, acusou á conselleira de Infraestruturas e Mobilidade, Ethel Vázquez, de querer "desviar a atención" sobre a orixe do brote de gastroenterite que houbo no municipio despois de que, fronte ao argumento municipal, descartase que estivese no río Mendo por presenza de norovirus.

E é que a titular de Infraestruturas vinculou o sucedido coa rede de abastecemento e sostivo, en base ás analíticas realizadas, que no río Mendo non houbo valores de norovirus superiores a outros ríos e descartou que se puidese relacionar co citado brote, en base ás conclusións dos técnicos.

"Será a xustiza a que ao final diga quen mente neste asunto, o que teño claro é o que pon o informe da Garda Civil que recolle as analíticas de Augas de Galicia durante o mes de xuño en varios puntos do río Mendo, augas arriba da captación".

"E ese informe é claro, hai presenza de norovirus no río Mendo neses puntos, uns días en todos os analizados, outros días nalgún deles, por tanto, quen mentiu é a Consellería e Augas de Galicia cando afirmou, en pleno brote de gastroenterite, que a orixe estaba na rede de abastecemento xa que no río non había norovirus", afirma a alcaldesa María Barral.

A primeira edil lembrou que durante o brote pedíronse por parte do consistorio a Augas de Galicia os informes das analíticas do río, "pero curiosamente nunca chegaron ao concello". "O único que se repetiu por activa e por pasiva, tanto nas reunións como nos medios, foi que non había norovirus na auga do río".

"A única que escurrió o vulto durante todo o brote foi a propia conselleira que nin apareceu, nin chamou, nin se preocupou pola situación e si porque se lle ocultase ao Concello os resultados das analíticas para poder seguir dicindo que a orixe non estaba no río senón na rede de abastecemento", sinala nun comunicado.

Rio Mendo en Betanzos | Fonte: Wikipedia - Arquivo