España aposta por "impulsar unha repartición solidaria e responsable" dos menores migrantes non acompañados
Por Europa Press / Redacción | MADRID | 20/12/2023 | Actualizada ás 16:53
A ministra de Mocidade e Infancia, Sira Rego, apostou por "impulsar unha repartición solidaria e responsable" na distribución de menores migrantes non acompañados durante a sesión de control ao Goberno no pleno do Congreso. "Temos toda a prioridade do mundo respecto ao cumprimento dos dereitos humanos, por suposto dos dereitos dos nenos e das nenas non acompañadas, non acompañados que cada vez chegan con menor idade e, por suposto, facer todo o posible por impulsar unha repartición solidaria e responsable de entre todos os territorios do país", asegurou Rego en resposta á pregunta da deputada do PNV, Maribel Vaqueiro Montero, sobre se considera o Goberno que hai elementos a mellorar na xestión das persoas menores non acompañadas que chegan ao Estado.
Así mesmo, indicou que o actual modelo de acollida "é necesario melloralo, profundar nel e, sobre todo, abordar de maneira franca e tamén con moita intensidade un diálogo para ver onde ten que haber modificacións". Así o manifestou en resposta á deputada por Coalición Canaria, Cristina Valido, de se ten o Goberno intención de emprender modificacións na Lei de Infancia e Adolescencia. Neste sentido, apuntou que o diálogo servirá para xerar "un debate, unhas medidas e unhas conclusións" que permitan distribuír "dunha maneira vinculante, solidaria", ás persoas menores, aos nenos e nenas que chegan non acompañados, "dunha maneira responsable e dunha maneira solidaria entre todos os territorios".
