A CIG critica a reforma do subsidio de desemprego: "Buscan maquillar os datos e falsear a realidade"
Di que é un acto de "propaganda" do Goberno que profunda na "privatización" dos servizos públicos
Por Europa Press / Redacción | SANTIAGO DE COMPOSTELA | 22/12/2023 | Actualizada ás 18:02
A Confederación Intersindical Galega (CIG) criticou este venres a reforma do subsidio por desemprego ao entender que "dificulta o acceso a unha prestación e reduce contías e duración".
Nun comunicado, a organización sindical lamentou que esta modificación da normativa aumenta tamén a capacidade das empresas de transferir ao sector público "os custos sociais da situación de empobrecimiento e precariedade xeneralizada pola extensión dos baixos salarios e da contratación parcial e fixa descontinua".
Para a CIG, esta reforma profunda na "privatización" dos servizos públicos de emprego, xa que as axencias privadas de colocación realizarán labores de intermediación laboral "ao mesmo nivel, intensidade e capacidade" que a Axencia Estatal de Emprego.
"Ademais, os traballadores beneficiarios de prestacións por desemprego estarán obrigados a participar nas actividades e programas que realicen estas axencias privadas", indicou a CIG, explicando que se trata dunha das modificacións impostas pola Unión Europea para acceder aos novos pagos dos fondos Next Generation.
"Uns fondos que están a hipotecar o noso futuro, xa que se condicionan á execución de medidas, baixo a forma de reformas, que constitúen un auténtico plan de axuste, de novos recortes de dereitos que se suman aos aprobados no seu día polo PP e que, a día de hoxe, seguen vixentes porque o actual Goberno non os derrogou", engadiu o sindicato.
Para a organización, estamos ante un novo capítulo de "propaganda" e de "esaxeración" levado a cabo polo Executivo central, con medidas "nas que non se avanza no recoñecemento de dereitos como se anuncia, senón que nalgún caso supón o contrario".
"Con estas reformas, igual que se fixo coa reforma laboral, buscan maquillar os datos de desemprego e falsear a realidade da precariedade laboral, antes marcada polos contratos temporais e hoxe pola contratación parcial e fixa descontinua", subliñaron desde o sindicato.
