Abre o prazo para solicitar as axudas para a elaboración e comercialización de produtos vitivinícolas

Os interesados en pedir as axudas para o fomento da elaboración e comercialización de produtos vitivinícolas poderán realizar a solicitude a partir deste xoves e disporán de prazo ata o 31 de xaneiro. O Diario Oficial de Galicia (DOG) publicou este mércores as bases reguladoras destas axudas, financiadas polo Fondo Europeo Agrícola de Garantía (Feaga), e que se convocan para o exercicio orzamentario de 2024. As contribucións son anuais e contan cun importe de 4.500.000 euros a executar entre os anos 2025 e 2026.

A orde do DOG estipula como subvencionables os custos de construción, adquisición ou mellora de bens inmobles, a compra de nova maquinaria e equipamentos ata o valor de mercado do produto e os gastos administrativos --sen superar o 4% dos custos subvencionables totais da operación--.

Tamén se axudará economicamente na adquisición ou o desenvolvemento de soportes lóxicos de computador e de patentes, licenzas, dereitos de autor ou o rexistro de marcas colectivas.

A Consellería do Medio Rural establece que os principais obxectivos da convocatoria son fomentar a integración das entidades asociativas agrarias e impulsar procesos sustentables desde o punto de vista ambiental a través do aforro e a eficiencia enerxética, das enerxías renovables e da valorización e tratamento dos residuos.

Igualmente, as axudas procuran fomentar a certificación ambiental das instalacións das empresas vitivinícolas, a produción ecolóxica e os produtos acollidos a réximes de calidade, así como favorecer a innovación mediante a introdución das tecnoloxías dixitais nas empresas.

Vide das Rías Baixas. DEPUTACIÓN DE PONTEVEDRA