O PP de Santiago acusa ao goberno local de "mentir" sobre o aumento de tarifas de Fontes do Sar e Santa Isabel
Por E.P. | SANTIAGO DE COMPOSTELA | 04/01/2024 | Actualizada ás 20:34
O grupo municipal do PP no Concello de Santiago acusou este xoves ao goberno bipartito de BNG e Compostela Aberta de "mentir" sobre a subida de tarifas do multiusos Fontes do Sar e o complexo deportivo de Santa Isabel, unha subida que "se aprobou na Xunta de Goberno do pasado 18 de setembro".
O edil 'popular' José Ramón de la Fuente sinalou que a alcaldesa e a portavoz do goberno, "ou menten sabendo que o están facendo, ou non se decatan de nada". Todo iso despois de que Miriam Louzao acusase ao grupo popular de "vivir instalado na mentira" cando fala de "tarifazos" nos orzamentos municipais.
De la Fuente subliñou que na Xunta de Goberno aprobouse un aumento do 12,40 % nas tarifas desas instalacións municipais, incremento que "se fixo efectivo desde o 1 de xaneiro" deste ano. Ademais, engadiu, na reunión do Consello de Administración de Xade do 9 de novembro, "os grupos municipais de BNG, Compostela Aberta e PSOE votaron a davor da subida de tarifas", que non apoiou o PP.
Os 'populares' volveron a criticar o mal estado desas instalacións e sinalaron que debe ser o Concello o que asuma o aumento de prezos mentres se manteñan esas condicións "lamentables" nos recintos e equipamentos.
VISITA AOS 'BELÉNS'
Por outra banda, o grupo municipal do PP realizou a súa tradicional visita aos 'beléns' da cidade, e reclamou unha aposta do goberno local por impulsar a tradición belenística de Santiago, como "un dos principais atractivos da cidade durante o Nadal".
O portavoz do grupo, Borja Verea, incidiu na importancia de "promocionar as múltiples actividades belenísticas" que xa existen en Santiago, onde poden visitarse unha ducia de 'nacementos' en distintos emprazamentos, con actividades como talleres, mercados ou certames.
