O Sergas amplía ata o 26 de xaneiro a campaña de vacinación contra a gripe e a covid
Os datos de Saúde Pública confirman que a incidencia baixa.
Por Europa Press / Redacción | | 09/01/2024 | Actualizada ás 14:04
O Servizo Galego de Saúde (Sergas) acordou unha nova ampliación ata o 26 de xaneiro da campaña de vacinación contra a gripe e a covid-19, que estaba previsto que concluíse este venres, día 12. Mentres tanto, a presión asistencial e as cifras de ingreso descenderon nas últimas xornadas.
A través dun comunicado, a Xunta lembra que é "o segundo período" co que se prolonga a campaña de inmunización contra ambos os virus respiratorios. Así, o sistema de autocita permanecerá habilitado para poder recibir a dose o conxunto de hospitais públicos galegos.
Neste contexto, tanto as persoas con idades entre 12 e 59 anos con algunha condición de risco, como persoas de 60 e máis anos poden pedir vez para ser vacinados no seu hospital de referencia. En canto aos nenos entre os 6 meses e os 11 anos de risco, os seus responsables poderán solicitalo a través da aplicación Sergas Móbil.
Ademais, as persoas que soamente queiran recibir a dose contra a gripe e non contra a covid tamén poden acudir ao seu centro de saúde, previa cita. Os horarios e puntos de vacinación pódense consultar na seguinte ligazón: https://coronavirus.sergas.es/Contidos/PUNTOS-VACINACION-COVID-GRIPE-2023
Ata o momento, vacináronse contra a gripe un total de 802.646 galegos, cunha taxa de cobertura do 82% en persoas maiores de 80 anos. Ademais, xa son máis de 36.000 os menores de 5 anos inmunizados, o 51,3%.
INCIDENCIA DA GRIPE
Por outra banda, o Sergas fixo público este martes datos sobre a incidencia da gripe en Galicia. O conselleiro de Sanidade, Julio García Comesaña, aseguraba esta mesma mañá --nunha entrevista na Radio Galega-- que, "se non no pico" de infeccións, a Comunidade está "nunha zona de meseta" e moi próximo a el.
As últimas cifras da Dirección Xeral de Saúde Pública apunta a un descenso da taxa de positividad da gripe, cun 27,9% --unha caída de 2,28 puntos--. Tamén a presión asistencial diminuíu, con 844 persoas ingresadas con gripe nos hospitais do Sergas --77 menos--, dos que 37 están na UCI --seis menos--. No tocante á covid, os datos do Sergas apuntan a 184 hospitalizados, cinco deles en unidades de coidados intensivos.
