Adega amosa "preocupación" porque o Plan Camgal se basee en decisións políticas en lugar de en criterios técnicos

O presidente de Adega, Roi Cuba, reuniuse este luns coa vicepresidenta segunda e conselleira de Medio Ambiente, Territorio e Vivenda, para transmitirlle a súa "preocupación" pola xestión da vertedura de pélets e para solicitarlle que a activación do Plan Camgal se base en criterios obxectivos e non sexa unha decisión política.

A propia conselleira avanzaba esta mañá, tras asinar un convenio de colaboración coa Cemma, que se reuniría coa asociación, así como con outras, e que lles pediría saber a quen elixirán para incorporarse ao comité de expertos que está a crear a Xunta para avaliar os efectos da vertedura. A composición deste comité, sinalaba Vázquez, publicarase este martes.

En canto á reunión, e tal e como detallan nun comunicado, Cuba transmitiulle a preocupación do movemento ecoloxista galego "pola falta de reacción temperá, de transparencia e información e dunha xestión adecuada por parte da Xunta de Galicia". Entre as peticións da asociación está a revisión do plan Camgal. Explican que actualmente a súa activación depende da vontade política do goberno de quenda "e non de causas técnicas ou obxectivas".

Piden revisar o procedemento de aplicación, así como activar un Comité Científico Permanente destinado a avaliar os riscos de futuros eventos contaminantes no mar no que estea representado o ecoloxismo galego, a través da Federación Ecoloxista Galega. Outra das condicións expostas para "a correcta xestión das verteduras mariñas" é contar cunha información pública "constante, rigorosa e veraz" sobre accidentes marítimos, así como da previsión ou evolución dos posibles vertidos, zonas afectadas, natureza dos residuos, etc.

Sobre isto, Adega pediulle á conselleira de Medio Ambiente que poña a disposición do público xeral un portal web de información permanente, en tempo real "ou case-real", sobre verteduras mariñas e a calidade das augas, parecido ao que usa a Comisión Europea para informar os incendios forestais na plataforma web EFFIS (European Forest Fires Informativo System).

"A posta en marcha dun sistema de información en rede sobre este tipo de incidencias permitiría tamén que as ONGs e concellos recibamos as alertas ao mesmo tempo que os organismos administrativos responsables (Salvamento Marítimo-Ministerio, Consellaría do Mar, Medio Ambiente...) o que sería de gran axuda para organizar con tempo as eventuais accións de voluntariado que puidesen ser necesarias, chegado o caso", indicaron.

En terceiro lugar, Adega considera "determinante" que a Xunta "mostre e demostre unha absoluta vontade de colaboración e coordinación con outras administracións competentes", como concellos ou o Goberno do Estado, para afrontar "coa maior celeridade e eficacia os traballos de detección, vixilancia, control e eliminación das verteduras contaminantes".

O VOLUNTARIADO TIVO QUE ACTUAR SEN COÑECER O PROTOCOLO DE LIMPEZA

Na reunión, Cuba tamén sinalou algunhas solicitudes en canto ao voluntariado, respecto ao que tamén aprecian "deficiencias de xestión e lentitude na resposta". "A Xunta tardou en proporcionar á cidadanía un protocolo de limpeza e unhas instrucións claras de actuación. Tampouco dispoñen dos medios e recursos necesarios, deixando en mans de organizacións ecoloxistas a responsabilidade de informar o voluntariado de como proceder adecuadamente para limpar as praias", lamentan.

A este respecto, lembran que o Plan Camgal non publicou o seu protocolo para voluntariado en praias ata dez días despois de activarse, o que provocou que boa parte da marea de voluntarios que se achegaron nun inicio ás praias fixéseno de forma caótica e sen as debidas precaucións para evitar maiores afeccións sobre as zonas a limpar e sobre a súa propia saúde".

Adega tamén lle propuxo á Consellería establecer un acordo de colaboración para a custodia ambiental do litoral galego durante todo o ano e unha xestión adecuada do voluntariado contra o lixo mariño, "que permita concienciar e sensibilizar sobre a contaminación crónica dos mares e praias". Tamén lle solicitou á responsable autonómica apoio "inmediato" para favorecer a participación ordenada do voluntariado que se ofrece a axudar.

Por último, a organización incidiu na necesidade de priorizar as actuacións nas zonas de cría da píllara das dunas, "unha especie protexida e vulnerable", que habita os areais galegos e que en mes e medio comezará a criar nas dunas. Tamén que a consellería "dea instrucións claras" a todos os concellos litorais para que cesen no uso de maquinaria pesada para a limpeza das praias, "xa que estaría a agravar a situación dos areais ao enterrar os pélets, compactar a area das praias e retirar innecesariamente os residuos naturais que son imprescindibles para a biodiversidade litoral".

PLATAFORMAS RECLAMAN UNHA "INTERLOCUCIÓN" EFICAZ COA ADMINISTRACIÓN

As Plataformas do Voluntariado da Coruña, Cantabria e Asturias pediron un "protocolo" de actuación nas praias para coordinar ás persoas voluntarias ante a crise da vertedura de pélets, así como unha "interlocución estreita" coas administracións para garantir a eficacia da tarefa dos voluntarios.

Así o puxeron de manifesto nunha reunión o pasado venres 12 de xaneiro, para adoptar unha posición común de cara á xestión do voluntariado na crise da vertedura de pélets de plástico nas costas do norte, segundo informou este luns a Plataforma do Voluntariado.

Ao encontro, organizado pola Plataforma do Voluntariado de España, asistiron Cruz Rodríguez Etcheverría, da Plataforma Coruñesa de Voluntariado; Andrés Maior Lorenzo e Fernando García Méndez, da Plataforma de Voluntariado de Asturias e Luís Alberto González García, representante da Plataforma de Voluntariado de Cantabria.

Na reunión expúxose a necesidade de coordinar ás persoas voluntarias que acoden á zona. "Debe haber un protocolo de actuación nas praias; o voluntariado non pode operar en base á boa vontade, sen coñecer o espazo en que se move, nin ter directrices técnicas porque o dano que se pode ocasionar pode ser maior", sinalaron. No caso de Galicia, a Xunta colgou na web do Camgal un protocolo de actuación para voluntarios, así como vídeos con consellos para orientar o seu labor.

WWF PIDE UN PLAN GLOBAL ANTE UN "PROBLEMA MUNDIAL"

Por outra banda, un equipo de WWF percorreu durante o fin de semana algúns dos puntos de Galicia máis afectados a vertedura de pélets plásticos para entrar en contacto directo cos equipos de persoas voluntarias e comprobar de preto o impacto da súa chegada. Raúl García, experto en océanos de WWF, lembrou, a tenor desta situación, que todos os anos chegan aproximadamente unhas 230.000 toneladas pélets aos mares.

"Trátase dun problema mundial e non podemos esquecer que os plásticos chegaron a todos os hábitats e a todos os territorios", destacou, apuntando que é necesario de forma "urxente" un "tratado global contra o plástico e, a escala europea, unha proposta de lexislación ambiciosa para reducir as verteduras de microplásticos, incluídos este tipo de pélets".