2023, o ano máis cálido en Galicia dende 1961, e tamén o máis húmido dende o 2000
Juan Taboada, meteorólogo de Meteogalicia, insistiu no balance anual do 2023 en que ningún mes foi "frío"; algo que xa pasou en 2022. "Levamos 25 meses, desde decembro do ano anterior, sen ningún mes frío. É algo a considerar; estatisticamente é moi rechamante", comentou.
Por Europa Press / Redacción | SANTIAGO | 17/01/2024 | Actualizada ás 16:24
O ano 2023 foi o máis húmido e cálido das últimas seis décadas, cunha temperatura media de 14,9 graos, "un valor tan alto que fai que o ano se considere como extremadamente cálido". Estes son algúns dos datos que se desprenden do balance climatolóxico anual elaborado por Meteogalicia e do que informou este mércores a vicepresidenta segunda e conselleira de Medio Ambiente, Territorio e Vivenda, Ángeles Vázquez, xunto ao meteorólogo Juan Taboada.
A anomalía positiva rexistrada foi de 1,3 graos con respecto aos valores esperados. "Foi o ano máis cálido das últimas seis décadas, ao rexistrar a temperatura media máis elevada desde 1961", remarcou. Segundo a temperatura media rexistrada, dos 12 meses, tres alcanzaron valores normais (xaneiro, febreiro e xullo), 8 foron considerados cálidos ou moi cálidos (marzo, abril, maio, xuño, agosto, setembro, novembro e decembro), e outubro destaca "como extremadamente cálido".
A maiores, indican tamén que as temperaturas mínimas rexistraron unha anomalía positiva de 1,2 graos con respecto ao habitual e as máximas foron 1,3 graos máis elevadas do esperado. No que respecta ás precipitacións, o volume de choivas foi maior do esperado, polo que 2023 considérase un ano moi húmido. A precipitación media na comunidade foi de 1.560 litros por metro cadrado, o que supón "un 21 % máis do que cabería esperar". Para atopar un ano máis húmido hai que remontarse ao ano 2000. Febreiro e maio foron moi secos; abril e xullo, secos; xaneiro, xuño, outubro e novembro, moi húmidos; marzo e setembro, húmidos; e agosto e decembro rexistraron valores normais.
Pola súa banda, Juan Taboada insistiu en que ningún mes foi "frío"; algo que xa pasou en 2022. "Levamos 25 meses, desde decembro do ano anterior, sen ningún mes frío. É algo a considerar; estatisticamente é moi rechamante", comentou, tras o que fixo referencia ao efecto invernadoiro e a subida de temperaturas aparellada a el. En canto á choiva, matizou que "nin chove máis nin menos", pero si o fai dunha forma "diferente", "máis desordenada". Así, destacou que se producen períodos de inundacións, pero lembrou que no verán, por exemplo, houbo alertas por seca.
PROGNÓSTICO PARA OS PRÓXIMOS DÍAS
Por outra banda, o meteorólogo tamén se detivo no prognóstico meteorolóxico para os próximos días. Este mércores continuaremos baixo os efectos da borrasca Irene, "que é bastante profunda e pasa moi preto do litoral", polo que deixa unha situación de temporal, con ventos fortes de suroeste.
Empeorará pola tarde, avanzou, con choivas que poden ser puntualmente fortes e con avisos no mar de nivel laranxa, que foron amarelos o resto do día. As ondas poden superar os catro metros e xa para a tarde-noite, os cinco metros. O xoves será unha xornada de transición cara a un anticiclón, con ventos de norte e nordés.
