Galicia alcanza un superávit de 169 millóns en novembro, o 0,22 % do PIB
Por Europa Press / Redacción | SANTIAGO DE COMPOSTELA | 31/01/2024 | Actualizada ás 16:28
Galicia rexistrou ata novembro de 2022 un superávit de 169 millóns de euros, o 0,22% do Produto Interior Bruto (PIB), segundo os datos publicados polo Ministerio de Facenda este mércores. Esta situación contrasta con que no mesmo período de 2022, cando a comunidade galega contaba cun déficit de 91 millóns (- 0,13 % do PIB).
O conxunto das comunidades rexistraron un déficit a finais de novembro de 4.668 millóns, o que equivale ao 0,32 % do PIB, cifra inferior nun 40,3 % á obtida no mesmo período de 2022. Este resultado obedece a un aumento dos gastos do 4,3 %, mentres que os ingresos crecen a un ritmo do 6 %.
Pola súa banda, o déficit do conxunto das administracións públicas, excluídos os concellos, alcanzou os 27.631 millóns de euros ata o mes de novembro de 2023, o que supón o 1,89 % do PIB, un 4,3 % menos que no mesmo período do ano anterior. Se se inclúe o saldo da axuda ás institucións financeiras por importe de 324 millóns, o déficit público sitúase no 1,91 % do PIB ata novembro, a un mes do peche do dato do 2023, cando o obxectivo do Goberno é rexistrar un déficit do 3,9 %.
O déficit da Administración central sitúase en 27.671 millóns de euros en novembro de 2023 (excluída a axuda financeira), o que corresponde ao 1,89 % do PIB. Se se inclúe a axuda a institucións financeiras, o déficit da Administración Central alcanza os 27.995 millóns de euros. O Estado, pola súa banda, rexistrou un déficit equivalente ao 2,15 % do PIB, fronte ao 2,22 % existente en novembro de 2022, ata un total de 31.381 millóns de euros.
