Villares ve "insuficiente" o PERTE e critica que non responde ás necesidades e expectativas do sector

O conselleiro do Mar, Alfonso Villares, tachou de "insuficiente" a dotación do PERTE para a cadea mar-industria, anunciado polo ministro de Industria, e criticou que non achega os recursos prometidos polo Goberno.

Así o trasladou Villares durante unha visita ás instalacións dunha empresa frigorífica de Marín, na que lembrou que este sector emprega en Galicia a 50.000 persoas e factura 9.000 millóns de euros.

Segundo lembrou o conselleiro, o sector leva "máis de dous anos esperando" por este PERTE, tras a súa exclusión do PERTE agroalimentario, e o Goberno anuncia a mobilización de 50 millóns de euros, cando este sector reclamaba 400 millóns. Por iso, lamentou que o plan non responde as expectativas e necesidades da cadea mar-industria, que necesita eses recursos para a súa transformación e mellora.

Alfonso Villares insistiu na necesidade de que se rebaixe o IVE do peixe, o marisco e as conservas, unha medida "imprescindible" para incentivar o consumo, e criticou a "cerrazón" do Executivo, cando é algo que se fixo noutros países da contorna, con "resultados".

RECORTES ABADEXO E RAIA

A Dirección Xeral de Pesca, Acuicultura e Innovación Tecnolóxica presentou alegacións contra os recortes que establece nas súas últimas resolucións a Secretaría Xeral de Pesca (SGP) ao abadexo e á raia.

Estas decisións do Ministerio de Pesca trasladan os recortes das cotas de capturas que para estas especies decidíronse no pasado Consello de Ministros de Pesca da UE, polo que a Consellería do Mar elévanse argumentos para tratar de limitar o impacto na frota galega.

No caso do abadexo, advírtese de que a baixa cota inicial de 70.000 quilos establecida para 2024 e 2025 para a zona 8C (ao norte de Fisterra e o Cantábrico) vese reducida por quedar o ano pasado en 55.765 quilos.

Así, apúntase que a Secretaría Xeral de Pesca establece na resolución que en base á evolución dos consumos poderíase engadir a porcentaxe que se determine da cota de España de zonas como a 9A (de Fisterra cara a sur), con respecto das necesidades da frota autorizada nesas zonas. O ano pasado sobraron nesa zona 20.000 quilos, e, tras o recorte do 53% para este ano, a 93.000 quilos, as posibilidades de capturas quedan nos 113.800.

Por parte da Xunta reclámase a acumulación de ambas as cotas e a análise de posibilidades a futuro para derivar posibilidades de pesca non consumidas de abadexo noutras zonas. Tamén se alega fronte ao segundo punto da resolución, que establece topes de capturas para as zonas 8C e 9 de 10 quilos/buque para o palangre de fondo e de 5 quilos/barco para o resto de modalidades. Considérase que non se axusta ao consumo maioritario da cota de abadexo en Galicia, pois nos últimos 10 anos correspóndese coas artes menores (1.718.765 quilos), seguido do palangre de fondo (575.936 quilos) e o volante (354.832 quilos acumulados). Reclámase axustarse á dependencia de cada frota dada a moita maior importancia que se reflicte para as artes menores.