Organizacións agrarias galegas únense para preparar mobilizacións, que aprazan a despois do 18F
Tamén realizan unha táboa de reivindicacións na defensa dos intereses e dereitos do sector produtor.
Por Europa Press / Redacción | SANTIAGO DE COMPOSTELA | 02/02/2024 | Actualizada ás 14:55
Unións Agrarias, Sindicato Labrego Galego, Asociación Agraria de Galicia e Asociación Galega de Cooperativas acordaron este venres "unidade de acción" para programar un calendario de mobilizacións e unha táboa de reivindicacións na defensa dos intereses e dereitos do sector produtor.
As organizacións agrarias entenden que "sobran motivos" para a mobilización e fan un chamamento a todos os agricultores e gandeiros a sumarse. Con todo, avanzaron o seu rexeitamento a "mesturar mobilizacións e citas electorais", polo que aprazan calquera acción ata pasar as eleccións autonómicas.
Do mesmo xeito, aseguraron que esperarán ás conclusións dos acordos e propostas aos que chegue este venres o Ministerio de Agricultura coas organizacións a nivel estatal para poder avaliar en conxunto a situación. Así, segundo puido confirmar Europa Press, o luns volveranse a reunir para fixar os puntos nos que están de acordo, xa que consideran que "é mellor facer unha mobilización conxunta e unir esforzos".
Entre as preocupacións do sector, lembraron a entrada en vigor da nova normativa de nutrición dos chans, que limita as aplicacións de xurros e "obriga a facer investimentos inasumibles para moitas granxas familiares"; os novos requirimentos en materia sanitaria, como a obrigatoriedade de contar cun veterinario de explotación; ou a aparición de novas ameazas, como a enfermidade hemorrágica epizoótica.
Unhas novidades que, censuraron, chegan en paralelo á entrada en vigor da nova PAC e dos novos requirimentos europeos en materia ambiental. Ademais, lamentaron que o pago por baixo dos custos de produción e a imposición de prezos "seguen sendo prácticas habituais". Estas son cuestións que, defenderon, "necesitan solucións contundentes a través dun incremento do coidado das administracións e un reforzo dos medios e actuacións do control".
