Aberto o prazo para arrendar parcelas a través do Banco de Terras de Galicia

A Consellería do Medio Rural abriu este luns, 4 de novembro, o prazo para presentar as solicitudes de arrendamento de parcelas a través do Banco de Terras de Galicia, que estará aberto ata 22 de novembro. Como novidade, e para dar cumprimento á Estratexia Retorna 2023-2026, neste período incorpórase a figura do retornado galego nos criterios de adxudicación de predios para aproveitamentos agrícolas e gandeiros e a asignación dunha puntuación ao mesmo, partindo da idea do retorno non só como un dereito, senón como unha vantaxe competitiva para incorporar á sociedade galega persoas de distintos países coa súa formación e experiencia profesional.

Tras a publicación do Real Decreto 1177/2023, do 27 de decembro, polo que se modifican diversos reais decretos ditados para a aplicación en España da Política Agraria Común, variouse a condición de que o solicitante non recibise "dereitos da reserva nacional en anteriores asignacións de dereitos de pago básico da renda nacional ou dereitos de axuda básica á renda para a sustentabilidade da reserva nacional". Por iso, favoreceuse o acceso á reserva nacional para "responsables de explotacións que participen en programas de reestruturación, cuxo obxectivo sexa evitar o abandono de terras, no marco dunha intervención pública mediante unha norma autonómica con rango de lei".

Ademais dos beneficiarios que participan en programas de reestruturación, como os polígonos agroforestais, aldeas modelo, actuacións de xestión conxunta ou permutas de especial interese agrario, o Banco de Terras tamén está considerado como un instrumento de mobilización. Por iso, só co arrendamento a través do Banco pódese acceder a estes dereitos. A única limitación sería cumprir os requisitos xerais e a dispoñibilidade de dereitos da axuda básica á renda para a sustentabilidade na reserva.

A supresión do requirimento de non recibir con anterioridade dereitos de pago básico da reserva nacional permitirá solicitar axudas á renda para a sustentabilidade de moita superficie que a día de hoxe é deficitaria de dereitos. Calquera persoa que precise terras para desenvolver ou ampliar unha explotación agraria ou forestal, ou para desenvolver un proxecto con outros fins, pode dirixirse ao Banco de Terras. Nel poderá atopar unha relación permanentemente actualizada das leiras que están dispoñibles e solicitar o seu arrendamento ou cesión por un período de tempo determinado.

Varias vacas pastan cun fondo de monte queimado no Sollío, a 30 de marzo de 2023, en Baleira | Fonte: Carlos Castro - Arquivo