(Vídeo) Queres visitar unha carballeira de ensoño chea de animaliños e trasgos? Acompáñanos!
Atópase no concello de Ames e é perfecta para ensinar os nomes dos animaliños dos contos e das lendas en galego aos máis pequenos da casa.
Por Ángela Precedo | SANTIAGO | 03/02/2024 | Actualizada ás 10:30
Hai un recuncho no concello de Ames que non podes perderte se queres pasar unha tarde entretida en familia e se buscas plans para facer con nenos. Chámase oficialmente carballeira de Paramuíño, e atópase ao lado do CEIP de Ventín e do campo de fútbol de Biduído, pero xa ninguén lle chama así. Dende fai uns anos recibe o nome de Carballeira dos Trasgos, e é que se atopa habitada por seres das lendas e contos galegos. Un fermoso trasgo subido a unha árbore dá a benvida aos visitantes, que poden coñecer, ao mesmo tempo que se deleitan coa ducia de figuras de animaliños, os seus nomes en galego. Nomes tan fermosos como píntega, vacaloura, xoaniña, donicela, xeneta, bubela, bolboreta ou curuxa. Anímaste a buscalos todos?
