Arrestado por esconder no váter unha bolsa de cocaína e traficar con ela no bar
A detención tivo lugar en Cariño.
Por Europa Press / Redacción | SANTIAGO DE COMPOSTELA | 28/02/2024 | Actualizada ás 11:00
A Garda Civil detivo a un home en Cariño que tiña escondida na cisterna do váter do almacén do seu establecemento hostaleiro unha bolsa hermética que contiña 263 gramos de cocaína.
Segundo informou este mércores o Instituto Armado, axentes da Garda Civil de Ortigueira en colaboración con membros do corpo en Ferrol levaron a cabo un operativo que derivou no arresto deste home, investigado por un delito contra a saúde pública.
As denuncias veciñais sobre a actividade delituosa que supostamente este individuo levaba a cabo desde o seu bar motivou a apertura dunha investigación que levou aos axentes a inspeccionar o negocio.
No almacén do local, que dispuña dun circuíto pechado de vixilancia por cámaras, gardas civís localizaron 7,64 gramos de haxix e distintos obxectos relacionados coa manipulación de estupefacientes para a súa venda. Nesa mesma estancia, os axentes atoparon escondida na cisterna do váter do baño unha bolsa pechada de forma hermética que contiña 263 gramos de cocaína.
Ademais de ser arrestado por un delito contra a saúde pública, o propietario do establecemento hostaleiro tamén foi denunciado por outras 15 infraccións en seguridade cidadá, impostos especiais, consumo e seguridade social.
