O ex xefe de Policía de Boiro di que non tramitaba multas "por sobrecarga"
Está acusado de prevaricación. A fiscalía non ve delito na súa actuación, mentres que a acusación asugra que non tramitaba aquelas que el quería.
Por Europa Press / Redacción | SANTIAGO DE COMPOSTELA | 01/03/2024 | Actualizada ás 16:59
O que fose xefe de Policía Local de Boiro, que senta no banco acusado de prevaricación na tramitación de multas, afirmou este venres que non tramitou esas denuncias porque "tiñan erros" e "seguía instrucións" do instrutor para que non se "sobrecargara" o servizo con multas que "ían terminar en arquivo".
O acusado compareceu na última sesión do xuízo que se celebra na Audiencia Provincial da Coruña, na súa sede compostelá, pola xestión de multas no municipio coruñés e para determinar se interveu na non tramitación dalgunhas destas denuncias antes de ser suspendido no verán de 2019.
Na súa declaración, asegurou que o seu labor era principalmente a "organización interna" da comisaría e que, en canto ás denuncias, contabilizábaas "e separaba aquelas que debía remitir á xefatura de Tráfico das que ían vía municipal.
Antes de remitir as denuncias ao concello, dixo ante o tribunal, había "que comprobar se ían correctas" e, "se non había foto ou non se vía correctamente, non se mandaba". "Eu tiña reunións cos instrutores, que nos daban as pautas a seguir", engadiu, apuntando que o instrutor lle trasladou que "había moito volume de traballo" e instouno a non remitir aquelas denuncias que estaban incompletas, porque "ían ao arquivo".
"Seguía instrucións de que as que tiñan erros non se enviasen", ha apuntando o acusado, que respondeu a preguntas de Fiscalía e do seu defensa, alegando que el "nunca entrou a valorar as multas".
O FISCAL NON VE PREVARICACIÓN
Durante as súas conclusións finais, o fiscal, que non presentou escrito de acusación, asegurou que non ve prevaricación nos feitos que se xulgan e, en todo caso, de habela, lembrou que estaría "prescrita". Para Fiscalía, o acusado "era un mero tramitador" e non hai constancia de que tivese "capacidade de anular multas" se non, como moito, de ocultalas.
"A súa posible decisión non se proxectou nunha decisión administrativa, e a deslealdade non é o mesmo que unha decisión administrativa", dixo o representante do Ministerio Público, apuntando que, se se produciu ocultación de denuncias "pode ser outro delito ou levar consigo un expediente disciplinario, pero non é prevaricación".
A defensa, pola súa banda, lembrou que o procesado "xa foi expedientado" e apartado do seu posto, aínda que, engadiu, "non existe a máis mínima proba de cargo de que ocultou multas a propósito".
Para a acusación, pola contra, quedou "acreditado" que "non se tramitaban aquelas multas con respecto ás que o acusado tiña algún tipo de interese" e viu a súa actuación "arbitraria".
