Unai Sordo sinala que "hai marxe" para reducir a xornada laboral e aposta para iso por un "acordo tripartito"
Destaca que por primeira vez en España está a incrementarse "a produtividade do traballo" á vez que "sobe o emprego".
Por Europa Press / Redacción | SANTIAGO DE COMPOSTELA | 02/03/2024 | Actualizada ás 12:16
O secretario xeral de Comisións Obreiras (CC.OO.), Unai Sordo, sinalou que en España "hai marxe" para reducir a xornada laboral e apostou para iso por un "acordo tripartido", entre o Goberno, sindicatos e organizacións empresariais. Así o declarou aos medios de comunicación antes de participar en Santiago de Compostela no acto de entrega dos premios 10 de Marzo, convocados polo sindicato.
Para levar a cabo esa reforma da xornada, Sordo incidiu en que "é necesario" explorar un acordo coa Confederación Española de Organizacións Empresariais (CEOE) e mostrouse a disposición desa negociación. "Cremos que hai tempo para abordala, que temos uns meses por diante, pero antes ou despois a xornada laboral en España ten que baixar desas 40 horas que leva instalada desde o ano en que se implantou o Estatuto dos Traballadores", apostilou.
"ACORDO TRIPARTITO"
Unai Sordo, a preguntas dos medios sobre se a vicepresidenta segunda do Goberno e ministra de Traballo, Yolanda Díaz, contestou á petición que o sindicato fixo para solicitar a colaboración da patronal para reducir a xornada, puntualizou que "o que hai" é un acordo de Goberno que determina que se reducirá a xornada.
Así, o sindicato considerou que hai que "darlle unha oportunidade" á negociación coas organizacións empresariais e insistiu en que sería "moi bo" que esa baixada fora produto dun acordo tripartito --Goberno, sindicatos e organizacións empresariais--. Todo iso, xa que, tras a aprobación, deberán trasladala aos convenios colectivos, polo que, será "moito máis sinxelo" e haberá "moitas menos resistencias" a poder facelo desa forma.
"Hai que darlle unha oportunidade á negociación e senón o Goberno terá que actuar para cumprir o acordo. Estamos na fase de negociación. Vai ser moi difícil un acordo, pero eu non creo que sexa imposible e hai que apurar as posibilidades e creo que temos uns meses por diante para tentalo", aseverou.
POR PRIMEIRA VEZ "INCREMÉNTASE O EMPREGO"
Así mesmo, fixo referencia a un informe que o sindicato presentou este venres no que analizan a evolución do emprego en España desde o 2018 ata a actualidade. Segundo este documento, en España incrementouse en máis dun millón e medio os traballadores asalariados en termos netos. "O incremento do emprego en España fixo un salto adiante en materia de contratación indefinida que non coñeceramos nos últimos 40 anos", enxalzou Sordo.
Tamén se demostra con datos, continuou, que o emprego se "está xerando" en segmentos de media e alta produtividade, de medio e alto valor engadido, o que confirma que "era perfectamente compatible" subir os salarios mínimos interprofesionais e, á vez, "reducir drasticamente" a temporalidade e xerar emprego de "maior calidade".
Por primeira vez, en España está a incrementarse "a produtividade do traballo á vez que "aumenta o emprego". "Isto nunca pasara no noso país", subliñou.
DAR UN IMPULSO AOS SALARIOS
O secretario xeral de Comisións Obreiras fixo tamén un chamamento ás organizacións empresariais galegas para "dinamizar e reforzar" a negociación colectiva para "dar un impulso" aos salarios. "A subida dos salarios no ano 2023 está en Galicia en torno ao 4%, pero as subidas están un pouquiño por baixo da media salarial de España", explicou.
A continuación, pediu que "se tomen medidas serias" en materia de prevención de riscos laborais, polo que CC.OO. "empregará todos os seus recursos" para tratar de visitar, de "pór negro sobre branco", o que ocorre para "entender" por que hai accidentes laborais de carácter mortal. "Hai que fortalecer a actuación da inspección de traballo. Hai que velar porque en sectores como a construción, onde hai cadeas enteiras de subcontratación, coordinen a acción preventiva para minimizar os riscos laborais", esgrimiu.
Por iso, instou ás autoridades autonómicas a que "tomen cartas no asunto", a que garantan que se cumpran as normas de prevención de riscos e a que se coordinen as actividades preventivas das empresas principais ás empresas subcontratistas, posto que "moitas veces" os accidentes se producen nesas empresas que traballan para outras, onde "concorren a custos moi baixos" e "aforran" en prevención de riscos.
