Traballadores de Circet concéntranse en Pontevedra contra un ERE que suporía 118 despedimentos en Galicia

Traballadores de Circet Infraestruturas de Telecomunicacións S.A levaron a cabo este xoves unha concentración ante a Subdelegación do Goberno en Pontevedra para expresar o seu rexeitamento ao expediente de regulación de emprego (ERE) de extinción presentado pola empresa, que en Galicia suporía o despedimento de 118 persoas. Durante a protesta, os empregados aseguraron que o único obxectivo da compañía é "precarizar as condicións laborais no sector". Tamén sinalaron a responsabilidade de Telefónica neste conflito xa que, o pasado mes de xullo, o contrato con Movistar foi comprado por Circet previa autorización do Goberno do Estado.

Ademais de Movistar, Circet, que se dedica á instalación e mantemento de redes de telecomunicación, ten concesións en Galicia coa operadora Vodafone, e entre os seus clientes están a Xunta de Galicia, o Sergas, Educación, Emerxencias, Defensa e outras administracións estatais e locais, indicaron. Esta semana, os traballadores intensificaron a mobilización con tres días de folga que se completan este xoves e para a próxima teñen convocados novos paros para os días 4 e 5 de decembro, coincidindo coa data na que finaliza o período de consultas.

Segundo indicou o sindicato CIG, a folga está a rexistrar un seguimento de "practicamente o 100 % do persoal en toda Galicia". Este calendario de protestas desenvólvese de maneira paralela ás reunións do ERE que teñen lugar en Madrid. CIG-Industria insiste en que non existen causas organizativas, produtivas ou económicas, tal e como xustifica Circet, para aplicar este despedimento colectivo e aseguran que o verdadeiro obxectivo deste ERE non é outro que "avanzar na subcontratación" para "obter aínda maiores marxes de beneficios a conta da explotación laboral".

Protesta de persoal de Circet ante tenda de Movistar | Fonte: CIG - Arquivo