Segue a polémica sobre os contratos da Xunta en pandemia: Sanidade di que foron fiscalizados "sen tacha de legalidade"

A Consellería de Sanidade subliñou este martes que a información que demanda o BNG sobre a compra de máscaras durante a pandemia de Covid está incluída nun informe de fiscalización que fixo o Consello de Contas, e que o resultado desa fiscalización é que non houbo "tacha" nin "reparo" de legalidade, á vez que lamentou a "papeleta" dos nacionalistas, pretendendo "embarrar" para "desviar a atención" do caso Koldo, que afecta o Goberno central.

Así o trasladou o conselleiro Julio García Comesaña, en declaracións aos medios durante unha vista ao hospital vigués do Meixoeiro. García Comesaña insistiu en que a Xunta remitiu en decembro de 2020 toda a información detallada ao Parlamento de Galicia e que o Consello de Contas dispuxo da mesma, que "está colgada nos portais de transparencia". "Non se pode ser máis transparente nesa información", defendeu.

O titular de Sanidade afeou ao BNG a "papeleta" que está a facer ao reclamar os contratos e denunciar falta de transparencia. Todo iso, apuntou García Comesaña, para "desviar a atención do que está a pasar no Goberno que sostén, onde hai claros indicios de aparentes condutas ilícitas". Respecto diso, afeou aos nacionalistas que traten de pór o foco nun proceso onde a información foi "transparente" e que foi fiscalizado. "E o resultado é que non hai ningunha tacha, ningún reparo de legalidade nos procesos que fixo a Xunta", remarcou.

García Comesaña censurou que o BNG queira "emendar a plana" ao PSOE "tratando de embarrar" a actuación do goberno galego durante a pandemia, e atribuíu esta posición ao feito de que "o BNG non acepta que a pandemia en Galicia se resolvese como se resolveu", porque "lle gustou que se fixese todo mal". Agora, asumindo "o papel que lle toca", os nacionalistas pretenden "botar dúbidas e incerteza" sobre a actuación da Xunta. Finalmente, reiterou que "toda a información" solicitada polo Consello de Contas, dos servizos centrais e das áreas sanitarias, "foi remitida". "O informe está aí, a disposición do BNG desde hai moito tempo, e a disposición da cidadanía", sentenciou.

O DELEGADO DO GOBERNO DI QUE "NON FAI MAL A NINGUÉN" INVESTIGAR

Pola súa banda, o delegado do Goberno en Galicia, Pedro Blanco, rexeitou este luns analizar en profundidade a necesidade de que se investiguen os contratos de emerxencia adxudicados pola Xunta en pandemia, aínda que dixo que "non fai mal a ninguén" facelo "en aras do principo de transparencia".

Así o dixo, preguntado acerca da petición do BNG á Xunta de que se fiscalicen estes contratos de material sanitario por mor do ocorrido a nivel nacional co Caso Koldo, algo ao que se opón o Goberno galego alegando que xa foron analizados polo Consello de Contas. Sobre esta cuestión, Pedro Blanco considerou que "non lle faría mal que se deixasen investigar". O delegado rexeitou "meterse" en se "debe de haber ou non esa investigación", pero, "en aras do principio de transparencia", apuntou que "non faría mal a ninguén" analizar en profundidade os contratos, "o mesmo que está a ocorrer noutras comunidades autónomas" e "en España".

O PSOE LAMENTA A INSISTENCIA DO PP NO 'CASO KOLDO' 

O portavoz do Grupo Socialista, Patxi López, recoñeceu sentir "frustración" e "rabia contida" ante a insistencia do PP en atacar á presidenta do Congreso, Francina Armengol, polo caso das máscaras da trama do 'caso Koldo' e exponse levar a cargos autonómicos do PP, incluíndo presidentes, ante a futura comisión de investigación do Congreso sobre os procedementos de contratación de emerxencia durante a pandemia.

En rolda de prensa no Congreso, Patxi López expresou o seu "apoio absoluto" á presidenta do Congreso, Armengol, que ao seu xuízo deu "as explicacións oportunas e pertinentes", e dixo sentir "unha mestura de sorpresa, tamén de frustración e mesmo de rabia contida" ao ver que o PP seguiu atacando á presidenta. Ao seu xuízo, resulta do "teatro do absurdo" e "o colmo dos colmos" que quen aparece "con nomes e apelidos" no sumario --en referencia ao portavoz do grupo Popular, Miguel Tellado--, pida a dimisión de quen non o está (Armengol) e que o PP, a quen considera o partido "que deixou caer a reclamación" contra a empresa da trama, pida a dimisión de quen presentou a reclamación.