Rueda non pide a dimisión de Ayuso porque "saíu inmediatamente a dar explicacións" a "diferenza" do PSOE
Evita pronunciarse sobre se ve suficientes as explicacións de Ayuso e afea ao PSOE que trate de "esparcir sospeitas".
Por Europa Press / Redacción | SANTIAGO DE COMPOSTELA | 14/03/2024 | Actualizada ás 15:22
O presidente da Xunta en funcións, Alfonso Rueda, destacou que a súa homóloga madrileña e compañeira de partido, Isabel Díaz Ayuso, "saíu inmediatamente a dar explicacións" sobre a investigación á súa parella por unha presunta fraude fiscal, algo que considera "unha enorme diferenza" a "o que está a facer" o presidente do Goberno, Pedro Sánchez, e o Partido Socialista sobre o caso Koldo. Por iso non considerou que teña que dimitir como si pediu que fixera a presidenta do Congreso, relacionada co caso Koldo, a pasada semana.
A preguntas dos medios tras a reunión do Consello da Xunta deste xoves, o mandatario autonómico evitou concretar se dá por boas as explicacións ofrecidas por Díaz Ayuso sobre as informacións aparecidas nos últimos días que vinculan á súa parella sentimental, Alberto González Amador, cunha suposta evasión de impostos cometida despois de actuar como intermediario na adquisición de material sanitario por administracións españolas durante a pandemia.
Para Rueda, hai unha "enorme diferenza" entre o ocorrido ao redor da presidenta madrileña e o que envolve ao caso que investiga a trama do exasesor do ministro de Transportes, José Luís Ábalos, e reside en que Ayuso "saíu inmediatamente a dar explicacións".
"Poida que haxa xente á que lle pareza que son suficientes (as explicacións), a outras non. Pero o que é moi importante, é que hai unha enorme diferenza co que está a facer o presidente do Goberno e o que está a facer o Partido Socialista en xeral", aseverou Rueda, quen evitou situarse sobre se persoalmente dá por boas as explicacións dadas pola súa compañeira de filas. "Pódese opinar ou non se son suficientes", apostilou tras ser repreguntado.
En contraposición, incidiu en que PSOE "non dá unha soa explicación, non conta nada e nunca fala dos temas que lle afectan directamente" e dedícase a "esparcir sospeitas" e "dicir que todo é igual para non falar nunca" das cuestións que lle afectan. Nesta liña, subliñou que prefire "pensar que non son certa" as últimas informacións publicadas sobre o caso Koldo, que cualificou de "terribles" e "incríbles", polo que volveu a insistir en que os socialistas deben "dar a cara". "Non dar ningunha explicación creo que é cada vez máis sospeitoso", apostilou.
