Continúa a polémica sobre o XIDE: os administrativos do Sergas tampouco queren preguntar síntomas aos pacientes

A Asociación de Persoal de Servizos Xerais do Sergas (APSX) reclamou este mércores de novo a retirada do programa de Xestión Integral da Demanda en Equipo (XIDE), que supón, denuncian, "un risco para os pacientes". A través dun comunicado, a asociación expresou o seu "enorme descontento" coa decisión do TSXG de "non retirar" este programa informático e adheriuse á iniciativa dos Colexios Médicos de Galicia contra o mesmo.

O persoal de xestión e servizos realiza "tarefas maioritariamente administrativas", lembra APSX, pero este programa obrígalles a "ter que preguntar a todos os pacientes que acoden a solicitar unha cita o motivo da súa consulta". Ademais, cando son varios os motivos, é o administrativo o que debe "decidir cales escribe no programa, porque o sistema XIDE non é capaz de valorar varios síntomas á vez". Esta orde determina a urxencia da consulta, co que supón "un alto risco para o paciente e unha responsabilidade" para este persoal.

Unha muller sae con máscara do Hospital Álvaro Cunqueiro de Vigo, a 10 de xaneiro de 2024, en Vigo | Fonte: Adrián Irago - Arquivo