Detido por delitos de violencia de xénero, roubo e condución sen licenza en Vimianzo
O home estaba en busca e captura.
Por E.P. | SANTIAGO DE COMPOSTELA | 04/04/2024 | Actualizada ás 10:12
A Garda Civil detivo en Vimianzo a un veciño de Coristanco ao que lle constaban catro requisitorias xudiciais emitidas por xulgados da Coruña, Carballo e Ferrol por delitos de violencia de xénero, condución sen licenza e roubo con forza.
Segundo informou o corpo, dous destas ordes, datadas en 2022, incluían procura, detención e ingreso en prisión. Os feitos que motivaron a detención tiveron lugar o pasado día 27 de marzo de 2024, cando os axentes tiveron coñecemento de que esta persoa podería desprazarse á localidade de Vimianzo a realizar xestións.
Segundo a Garda Civil, a súa detención dilatouse xa que, "ademais de ser proclive á fuga", o home era axudado polos seus familiares, que o ocultaban nos seus domicilios. Tras unha exhaustiva procura, foi localizado nunha vivenda próxima a Vimianzo. Tentou fuxir pola parte traseira da casa, pero foi detido no acto polas ordes xudiciais na súa contra.
O operativo contou coa participación de distintas unidades da Garda Civil, incluíndo o Posto da Garda Civil de Vimianzo, Muxía, Corcubión, o Equipo ROCA Carballo e USECIC da Comandancia da Coruña.
