A folga de letrados obriga a suspender por segunda vez o xuízo contra o 'Rambo galego'
A vista quedou fixada para o próximo 31 de outubro no Xulgado do Penal número 2 de Ferrol.
Por Europa Press / Redacción | FERROL | 08/04/2024 | Actualizada ás 16:42
O xuízo que estaba previsto celebrar na mañá deste luns no Xulgado do Penal número 2 de Ferrol, contra o popularmente coñecido como o 'Rambo galego', quedou aprazado ata o próximo 31 de outubro a consecuencia da incomparecencia do seu avogado da quenda de oficio, Jorge Lema, que se acolleu ao seu dereito a folga. O procesado será xulgado polo roubo de comida nunha zona rural do municipio de Valdoviño, onde foi retido por varios veciños ata que foi detido por axentes da Garda Civil.
Segundo detallou Jorge Lema a Europa Press, a súa ausencia debeuse a que está secundado unha convocatoria dos avogados pola quenda de oficio. "A este cliente funo a visitar ao cárcere, antes do primeiro xuízo, en novembro de 2023, que foi suspendido pola falta dunha testemuña crave, un axente da Garda Civil", lembrou.
A continuación, o letrado xustificou os motivos da súa adhesión á folga. "A nós págannos, que aínda non o cobrei, 30 euros por ir de Ferrol a Teixeiro, Curtis, en total 150 quilómetros, e temos que pagar autoestrada e gasolina, ademais de perder toda a mañá", exemplificou.
O avogado ferrolán detallou ante a súa ausencia na vista e a nova data establecida, "para dentro de cinco meses e medio, xa case fará tres anos desde a detención", que foi en febreiro de 2022, o que posibilitaría que alegase unhas dilacións indebidas, unha situación que cualificou de "cando menos moi paradoxal" da situación da xustiza.
CRÍTICAS AO CÁRCERE
A pesar de non celebrarse o xuízo, o procesado non perdeu a oportunidade de pedir ao xuíz que o trasladen de cárcere, ao asegurar que o tratan "moi mal" neste centro penal. Ademais, tamén asegurou que continua no cárcere só por "roubar comida, nada máis" e que o home que o retivo antes de ser detido pola Garda Civil agrediuno fisicamente. Ata a sede xudicial de Ferrol, na rúa Coruña, desprazáronse este luns os seis testemuños da parroquia de Loira, en Valdoviño, que deberán de regresar o próximo 31 de outubro, ademais dos dous axentes da Benemérita.
